Tunumiut sukkaniuteqataalerput
Tunumi qimussertartut peqatigiiffii marluk, tassaasut Kulusumi Sermiligaamilu peqatigiiffiit Kalaallit Nunaanni Qimussertartut Kattuffiannut ilaasortaapput.
- Eqqarput sikuniaataaqimmat maannakkut qimusserfigissallugu pitsaanersaanngilaq, taamaattumik sukkanniuunnissamut peqataaniarlutik qimmiminnik qimoriarsaaniartut umiatsiamik nunamiit sikumut qimusserfiginnerusumut ikaarunneqarlutik qimoriarsaasarput, Simujooq Taunajik, Sermiligaami qimussertartut peqatigiiffianni siulittaasoq KNR-mut nassuiaavoq.
Sermiligaami qimussertartut peqatigiiffianni siulittaasoq oqaluttuarpoq Kulusumi Avannaata qimussersuanut peqataatsinissamut marsip 10-ani anngunniuttoqassasoq. Naatsorsuutigaalu qimussit 20-it missaaniittut, Tasiilamit, taassumalu nunaqarfittaaneersut peqataassasut.
- Qimussit tikiuteqqaartut pingasut Avannaata qimussersuanut anngutissapput, Simujooq Taunajik erseqqissaavoq.
Kalaallit Nunaanni qimussertartut kattuffiata siulittaasuata Mikkel Jerimiassenip ilisimatitsissutaa naapertorlugu Avannaata qimussersuani qimussit 46-it ukioq manna sukkanniuteqataassapput.
- Maannakkut oqaatigisinnaanngilara sukkanniuuttoqalerpat Tunumeersut qanoq angusaqarsinnaassanersut, ilimaginngilarali siullerpaanut inissisinnaanissaat, Simujooq Taunaajik nassuiaavoq.
Avannaata qimussersua Tunumeersunit kingullermik 1993-mi peqataasoqarpoq.
Avannaata qimussersua Qasigiannguani marsip 31-ani ingerlanneqassaaq.