Tunumiut Katuami
![](/sites/default/files/styles/image_934x467/public/article_images/qajaq_630_2.jpg?itok=H1_1QqDT)
Erinarsoqatigiit, eqqumiitsuliortut allallu kulturikkut malunnaatillit Tasiilaminngaanneersut, Nuummi ulluni makkukani tikeraarsimapput.
”Tunumiut kulturiata nittarsaanneqarnera”, Kommuneqarfik Sermersuumi Piorsaanermik ingerlatsivik suleqatigalugu piviusunngortinneqartussaq pisussanik assigiinngitsorpassuarnik misigisassaqartitsissaaq.
Kalaamininernik assigiinngitsunik, soorlu aarrup neqaanik, qilalukkap mattaanik, puisip neqaanit nikkualinik 20 koruunimik akiliilluni Katuami sapaatiuppat misiliisoqarsinnaavoq.
Eqqumiitsuliortoq Paakkannak Ignatiussen Tunumiut qaannioriaasiat qilaasioriaasiallu pillugu marlunngornermi unnukkut oqalugiassaaq. Erinarsoqatigiit Inngeratsiler unnuup ingerlanerani aamma tusarnaartitsissapput tivanermillu takutitsissallutik.
Tunumiut oqaasi oqaatsillu pinngorfii pingasunngornermi unnukkut oqalugiaatigineqassapput. Tusarnaariat aamma Tunumiut atisaat pillugit oqalugiarfigineqassallutik. Erinarsoqatigiit Kangiata Akisunnera unnuup ingerlanerani Tunumiut atisaannik takutitsissapput.
Eqqumiitsuliortup Asser Paakkannaap eqqumiitsuliai Tunumiut kulturiata nittarsaanneqarnerata nalaani Katuami aamma saqqummersinneqassapput.