Tunumiuaqqat Islandimiittut
Tasiilami 6. klasse-mi atuartut ukiut tamaasa Danmarkiliartinneqartarneranni nunarfimmiut mininneqartarsimapput. Tamanna allanngortinniarlugu Kulusumi atuarfiup pisortaa Lars Peter Sterling iliuuseqarpoq, Islandimullu attaveqarnerit iluatseriarmata nunaqarfinni tallimani 6. klasse-mi atuartut tikeraarnissaat pisinnaanngorpoq.
- Atuartut puigunaatsumik misigisaqarput. Sapaatit akunnerisa marluk ingerlaneranni alloriarneq annertuuvoq pivoq. Tassami Kalaallit Nunaata avataani silarsuaq alakkarterpaat angajoqqaallu 700 kilometerinik ungasitsigisumiileraangata ilikkagaqarnartaqaaq. Naalaarluarnerulerput aammalu suleqatigiilluni suliamik naammassisaqarsinnaaneq ilikkarpaat isumaqarpungalu angerlamut apuunneranni tamanna malugineqarumaartoq. Siorna 6. klasse-mi atuartut Islandimut tunngasut ukioq tamanna sammivaat isumaqarpungalu uku tikeraareersut ukiumi atuarfiusumi aallartittumi taamatut ingerlajumaartut, Kuummiuni atuarfimmi pisortaq Bjarne Hauthorner KNR.gl-mut oqarpoq.
Piffissaq sivisooq aningaasanik katersuiniartoqarpoq ilaatigut kalaallit Islandimiullu peqatigiiffiat kalak.is aningaasaliisullu allat suleqatigalugit angalanissaq iluatsippoq. Minnerunngitsumik Air Iceland Kulusumiit Reykyavikimut suli timmisartuussisartoq iluaqutaavoq. Atuarfinniit neriuutigineqarpoq manna ingerlaqqissinnaajunmaartoq meeqqat ineriartornerannut pingaaruteqaqimmat. Kommunip ilinniartitsisut angalanerat taamaallaat akilerpaa, taamaattumik angalaneq kommunip aningaasaqarniarnernut annerusumik nanertuutaanngilaq.
- Atuartut oqaaseqatigiinngikkaluarlutik nalunaaquttap akunnerisa arlaqanngitsut ingerlanerinnaanni meeraativut Islandimiuaqqallu attavigiillualersarput. Ussersornikkut oqaatsit aporfiginagit attaveqaqatigiittarput. Atuartuutitta nunaqarfiup avataani silarsuaq paasisaqarfigaat Islandimiullu meerartaasa nuna eqqaamiutut qaninnerpaaq paasisaqarfiginerulerpaat, Bjarne Hauthorner oqarpoq.
Pisut pingaaruteqarnerit ilagaat Islandip præsidentianut Ólafur Ragnar Grímsson-mut pulaarneq. Præsidentillu apersuutigisimavai tunumi inuuniarnikkut atukkat assilisinnissarlu sioqqutilaarlugu sodavandillerlunilu kaagillersimavoq.
- Nuannerluinnarpoq Islandimiut præsidentiata kalaaliaqqat atuartut ilasserusummagit. Taanna suliffeqarfippassuillu angalanissamut tapiissuteqartut Reykyavikimut tikeraarneq puigunaatsunngortippaat. Nunaqarfimmiuaqqat nunaqarfinni tamakkuninnga misigisaqarnissamut periarfissaqarsimassanngikkaluarput, Bjarne Havthorner oqarpoq.
