Tunumit uiarnerit pillugit oqalugiartoqalersoq

Nuummi innuttaasut Nunatta oqaluttuarisaanerani kapitali pissanganartoq pillugu unnugu oqalugiartoqalerpat paasisaqarsinnaassapput.
Allattoq Karsten Sommer
novembarip 26-at 2015 05:00
Nutserisoq Simon Uldum -

Ilisimatusarfimmi oqaluttuarisaanermik ilisimasallip eskimologip Einar Lund Jensenip tamanut ammasumik oqalugiarnissaanut qaaqqusivoq.

Oqalugiarnissaa qulequtaqarpoq "Uiarnerit - Nunap Isuanut Angalaneq" tunumiullu kitaanut uiarnerisa oqaluttuassartaanut tunngassuteqarluni.

Tunumiut 1800-kkunni Nunap Isuata eqqaanut angalasarsimapput Kongelige Grønlandske Handel (KGH) niueqatigiartorlugu.

Ilarpassui tassani nunasipput tyskinillu Qatanngutigiinnianit kristumiunngortinneqarlutik. Kulturit assigiinngitsut, uiarnerit, qatanngutigiinniat ajoqersuiartortitaat danskillu niuertut naapinnerat, tunumit kitaanut uiarnernut inuiaqatigiinni pissutsinut tunngatillugu allannguutinik nassataqarpoq.

Uiarnerit kingulliit pillugit allattugaatit ikitsuinnaapput, ajoqersuiartortulli KGH-llu nalunaarutaat iluaqutigalugit uiartoqarneranut suut pissutaasimanersut aammalu Nunap Isuani nunaqalersut pillugit erseqqissumik paasisaqarfigineqarput.

Einar Lund Jensenip oqalugiarnera Ilimmarfiup auditoriaani unnugu nalunaaqutaq 19.30 aallartissaaq.