Tunumi uuliasiorluni qillerinissat qanittukkut pinavianngillat

Tunup Avannaata sineriaata avataani Grønlandshavet-mi immaqa aatsaat ukiut 15-it qaangiuppata uuuliamik ujaasilluni qillerisoqarsinnaassaaq. Avatangiisinut tunngatillugu sillimaniarnerup isornartorsiorneqarneranut atatillugu, Dong Energy-mit oqaaseqartitaq aviisimut Politikenimut ullumi taama ilaatigut akissuteqarpoq.
Allattoq Elisa Isaksen
januaarip 14-at 2014 09:02

Nunaoil, Italiamiut ENI aamma Tuluit Nunaanneersoq BP peqatigalugit, Danmarkimi nukissiuuteqarnermut suliffeqarfiup taassuma Tunup avannaata sineriaata avataani uuliamik ujaasinissaq pilersaarutigaa.

- Tunup Avannaata sineriaata avataani misissueqqissaarluni qillerinissaq siusinnerpaamik ukiut aqqaneq marluk 15-illuunniit aatsaat qaangiuppata pisinnaassasoq ilimagaara, Jan Terje Edvardsen Dongimi uuliamik gassimillu ujaasinermut pisortaq Politikenimut oqarpoq.

Taama oqaaseqarnera misissueqqissaarluni qillerinernit kingusinnerpaamik ukiut qulit qaangiuppata akitsuusiinikkut isertitaqarnissamik Naalakkersuisunit naatsorsuutigineqartunit allaaneruvoq.

Aviisimi allaaserisami avatangiisinik illersuiniaqatigiit arlallit isornartorsiorpaat oqarlutik "avatangiisini mianernartuni sikorsuarnit saatsersunit silarlummillu sunnersimaneqaqisumi" naalagaaffiup suliffeqarfiutaata qilleriniarnera isornartoqaqisoq.

- Kikkut tamarmik sikorsuarni saatsersuni umiartorsimasut nalunngilaat, tamaani qillerinissaq mianersuaalliornerujussuussasoq. Sarfaq sakkortooq avannaaneersoq Tunup sineriaa tamaat atuarlugu kujammut sarfartuuvoq. Tamaani maqisoortoqassagaluarpat, Tunu tamakkerluni sakkortuumik eqqugaasussaavoq, Avatap siulittaasua Mikkel Myrup Politikenimut oqarpoq.