Tunumi TB - mik misissuinissaq piareersarneqarpoq

Allattoq Carla Davidsen
oktobarip 20-at 2005 17:03

Tunumi meeqqat atuartut TB-mik tunillanneqarsimanerlutik ?

Apeqqut taanna Dronning Ingridip Napparsimmavissuani nakorsaanerup, Karin Ladefoged-ip, sapaatip akunneri arlaqanngitsut qaangiuppata akisinnaallugu neriuuteqarpoq.

Rigshospitalimiit Statens Serumsinstitut-imiillu misissuiartortussat ilagalugit maanna Ammassalimmut angalanissartik piareersarpaa.

Misissuinissatsinni soqutigaarput paasiniassallugit assigiinngitsut peqqutaallutik sakialluummik nappaateqartoqalersarnersoq. Assersuutigalugu ineqarneq, inuttut atugarisat, inooriaaseq tupa il.il. Nunassinni sakiallulersarnermut attuumassuteqarnersut assut paaserusupparput.

Misissuinitsinni aamma qanoq siusitsigisumik sakialluttoqalersarnersoq misissorniarparput.

Meeqqat sakialluummik nassaarfigissagaluarussigit qanoq neqerooruteqarfigissuisigit ?

Inuk sakialluummik tunillatsissimasoq tamatigut napparsimalerneq ajorpoq. Taamaakkaluartorli sakiallunnissaq qaninnerusarpoq – imaassinnaavoq ukiut arlaqanngitsut qaangiuppata aatsaat sakiallulersinnaasoq.

Meeqqat sakialluummik tunillatsisimanersut misissussavagut, nassaarfigissagutsigit napparsimalinnginniassammata akiuussutissamik tunisinnaavagut kiisalu malinnaaffigissallutigit.

Meeqqat sakialluummik nassaarfigissagaluarutsigit paasiniagassarissavarput suminngaanniit sakialluut pissarsiarisimassaneraat.

Sakialluummik tunillatsissimagaanni nappaatigilerlugu taava qanoq pisoqassava ?

Ukiup affaa katsorsartittoqartarpoq amerlanersaallu peqqissivittarput.

Nunatsinni sakialluut ukiuni qulini kingullerni tuniluuppoq ukiumut 60-t 100-llu akornanni nassaarfigineqartarput.

Karin Ladefoged oqaluttuarpoq misissueriaaseq nutaaq atorlugu misissuineq ingerlanneqassasoq. Ataasiarluni aaversisinnaarluni sakialluummik tunillatsissimaneq paasineqarsinnaasarpoq.