Tunumi skakkernersuaqaleruttorpoq
- Nunatsinni meeqqat inuusuttullu tuusintit arlaqartut, Hrókurinn aqqutigalugu, skakertarnerup silarsuaanut tupinnartumut ilinniartinneqarlutillu peqataatinneqartalerput, skakkertartut klubbiannit taama unnersiorput. Tunu Islandimit ukioq-manna tikeraarneqarpoq.
Islandimi skakkertartut klubbiat Hrókurinn februaarip 19-ianni Tunumukarpoq, sapaatip-akunneranilu ataatsimi tappavaniissalluni.
Tasiilami, Kulusummi Tiniteqilaamilu atuarfiit, ulluunerani paaqqinnittarfiit ornittakkallu pulaarneqassapput, skakkernermik ilaatigut ilinniartitsisoqassalluni, amerlasuunut skakkernersuaqassaaq pissartanngorniuttoqassallunilu.
Hrókurinnip Nunatsinnukarnissaannut Islandimi suliffeqarfippassuit inuinnaallu tunissutinik eqqugassanillu nassartitsipput.
Tunumi skakkerneq aqagu februaarip 26-ata tungaanut pissaaq, qulequtaritinneqarporlu: "Nuannaarneq tunaartaralugu".