Tunumi skakkerneq
Kalaallit islandimiullu ikinngutigiittut Islandimi peqatigiiffiat, KALAK, skakkertartartullu peqatigiiffiat, Hrorukin, meeqqanut skakkertitsisarlunilu unamminernik Tunumi ukiuni pingasuni kingullerni aaqqissuissarsimasoq, ukiumi nutaami pilersaaruterpassuaqarput.
Islandimi soqutigisaqaqatigiit assigiinngitsut suleqatigalugit, Ammassallip Kommuneani nunaqarfinni tamani, Illoqqortoormiunilu skakkillammassuaq Henrik Danielsen siuttoralugu, skakkernermik ilinniartitsisarnissamut aningaasanik katersuiniartoqassaaq.
Suleqatigineqartussanut ilaapput Reykjavikip Ilisimatusarfiani ilisimatusartut Ammassalillu Kommuneata illoqarfittut ikinngutaa, Kopavogur.
Kopavogur suleqatigalugu Tunumi meeqqanik nalunnermik ilinniartitsinissamik aningaasanik katersuiniarneq aamma siunertaqarpoq.
Kopavogurimi borgmesteri, Altingimilu ilaasortaq, Gunnar Birgisson, siuttoralugu, pisussaq siulleq ullumikkut tallimanngornermi marsip ulluisa pingajuanni pissaaq, tassaassalluni amerlasuunik ataatsimut skakkertitsineq.
