Tunumi saarullinniapiluttoqarmat: - Imminut akilersinnaananilu saarulleqassutsimut akornutaavoq

Uumassusilerisut namminneq aalajangiisuussagaluarpata, Tunumi saarullittassat 8.460 tonsinit amerlanerussanngikkaluarput.

Naalakkersuisulli allatut isumaqarput.

Taakkumi 32.945 tonsinik Tunumi saarullittassiipput. Taakku uumassusilerisut pisassatut innersuussutaasa sisamariaatingajaannik amerlanerummata Tunumi saarullinniapiluttoqarpoq.

- Ataatsimut isigalugu (aaqq. Kalaallit Nunaanni Islandimilu) saarullinniapiluttoqarpoq, tamannalu imminut akilersinnaananilu saarulleqassutsimut akornutaavoq, Pinngortitaleriffimmi ilisimatusartuuneq Teunis Jansen KNR-imut oqarpoq.

Saarulliit suminngaanneersuunerat paasissallugu pingaartoq

Tunup avataani ikkannersuarmi Dorhn Bankemi taama amerlatigisunik saarullittassiinertik nassuiaatissaqarluartoq, Naalakkersuisut oqarput.

Tamaanimi Islandip imartaaneersunik saarulleqarluartoq tamaanilu saarullinniarnerup saarulleqassutsimut pitsaanngitsumik sunniuteqarneranik suli ersiuteqanngitsoq, Naalakkersuisut isumaqarput.

Kalaallit Nunaanni suliffeqarfiit aalisakkanik nioqqutissiortut soqutigisaqaqatigiiffiat, Sustainable Fisheries Greenland (SFG), tamatumunnga tapersiivoq:

- Dorhn Bankemi saarulliit nunatsinni pisassatut innersuussat ilaattut isiginagit saarulleqatigiiaannik allaneersutut isigisasssaapput. SFG-p uumassussilerisut pisassatut innersuussutaannit amerlanerusunik saarullinniartoqarnera ataatsimut isigalugu tapersinngikkaluarlugu tamaani saarullinniapiluttoqarnissaanut aarlerinaateqarpianngissoraa, soqutigisaqaqatigiiffiup siulittaasua Lisbeth Due Schönemann-Paul KNR-imut allappoq.

AAMMA ATUARUK Aalisartut saarullittassiissutit unammissutigineqarnerulernerat ernummatigigaat: Umiarsuit amerlavallaareerput

Nunatsinnili aqutsiveqarfinni pisassatut innersuussat malinneqarnissaat pingaaruteqartoq Tunumilu saarullittassiissutit amerlasut, taanna aamma oqarpoq.

- Saarullittassalli kingulliit uumassusilerisut pisassatut innersuussitigisarsimasaaninngarnit amerlaneroqaat. Tamaanilu maanna saarullinniarneq qanoq kinguneqassanersoq siulittuutigisinnaanngilarput, taanna allappoq.

Misissueqqissaaleruttortut

Dorhn Bankemi saarulliit Islandip imartaaneersuussangatinneqarnerat aaalajangiisuussasoq tamannali suli qulaajarneqanngitsoq, Teunis Jansen oqarpoq.

Tamaanimi saarullittat saarulleqarfissuarmi Islandip imartaaneersuunersut saarulleqarfiorpianngitsumiluunniit Tunup imartaaneersuunersut suli nalornisigineqarpoq.

- Dorhn Bankemi saarullittat saarulleqarfissuarmi Islandip imartaaneersuunersut saarulleqarfiorpianngitsumiluunniit Tunup imartaaneersuunersut apeqquterujussuuvoq akisarialik. Suminngaanneersuugaluarpataluunniit ataatsimut isigalugu saarullinniapiluttoqarpoq. Taamaammat tamaani saarullinniarnerup saarulleqarluaannarnissaanut akornutaassaneranik naliliisoqarnissaa pingaarpoq, taanna oqarpoq.

Saarulliit sorliit Tunumi saarullinniapiluttoqarneranik eqqugaasinnaanersut qulaajarniarlugu Pinngortitaleriffimmiut ilisimatusaatigalugu suliniuteqarlutik misissueqqissaaleruttorput. 

Saarulliit Islandip imartaaneersut Tunullu imartaaneersut nalunaarsornerisigut immikkooruteqarnerannik misissoqqissaarneqarsinnaanersut, ilisimatusaatigalugu suliniummi ilaatigut paasiniarneqassaaq.

Pinngortitaleriffiup saarulleqassutsinik naliliinermut pisassanillu innersuussinermut najoqqutassialiartaani sapaatit akunnerata massuma ingerlanerani saqqummiutissavaa, taannalu nunarsuaq tamakkerlugu imarpiit pillugit ataatsimiititaliarsuarmit aamma nalilersorneqassaaq. 

Pinngortitaleriffiup najoqqutassialiartaava nunarsuaq tamakkerlugu imarpiit pillugit ataatsimiititaliarsuarmit akuerineqassappat, 2024-imi pisassanik innersuussinermut najoqqutassatut maajimi atuutilersinneqalersaarpoq.