Tunumi piniartut illuaqqiatik aningaasarsiorfigilluarpaat

Tasiilap eqqaani piniartut takornariat illuarassaannik arfineq-marlunnik, nammineq pigisassaminnik ingerlatassaminnillu, ukiuni kingullerni marlunni sanasimapput. Illuaqqat takornariaqarnermut suleqatigiiffimmit Destination East Greenlandimit aningaasalersorneqarlutillu tunniunneqarput, piniartulli annikinnerusumik aningaasaliissuteqarlutik, illuaqqat sananeqarnissaat isumagaat taamaalillutillu attartortitsineq aqqutigalugu immikkut ittumik isertitaqarnissaq iluaqutigalugu.

Suliniutilli tassunga killeqanngillat, suli illuaqqat arfineq-pingasut sananeqarnissaat ukiuni marlunni tulliuttuni pilersaarutaavoq.

- Sanaartortitsineq siulleq nunaqarfimmiut eqqarsaatigalugit ingerlanneqarpoq aappaalu illoqarfimmiunut sammitinneqarluni, tullissaanik nunaqarfimmiut nammineq illuaqqanik ingerlatassaminnik sananissamut periarfissinneqassapput, soqutiginnittorpassuaqarporlumi - aamma illuaqqiorsimasut siulliit akornanni. Periarfissaqarluarnera takusinnaalluarpaat, taama oqarpoq DEG-mi pisortaq, Pia Anning Nielsen, piniartullu tamaani suliniutinut soqutiginninnerat erseqqissarlugu.

- Naammagisimaarnartorujussuuvoq assersuutigalugu soorlu taakku inunngorfiini illuaqqanik sanatissinnagatsigit, aammami taakku uagutsinnut naleqqiullutik sumiiffiit attuumassuteqarfigisatik pitsaanerusumik takornarianut oqaluttuarisinnaagamikkik.

Suliniutillumi sumiiffinni piniartunut immikkut isertitaqarnissamut periarfissiinerata saniatigut aamma takornarianut tamaannarniartunut pitsaanerusumik neqeroornissamut aamma periarfissiipput:

- Takornarianut tuniniarneqarsinnaasunik tunisassiornissaq anguniagaavoq, illuaqqat ataatsimut ataqatigiissaarlugit  aasaanerani ukiuuneranilu misigisassarsiorlutik takornariartunit, qajartoriartortunit aamma takornarianit qimusseriartortunit atorneqarsinnaasunngorlugit.

Kisiannili illuaqqat tamakkerlutik suli sananeqarsimanngimmata takornariartussanut siammasissumik neqeroorutigineqarnissaat pisimanngilaq, taamaattorli inoqarpoq illuaqqanik attartortalereersimasunik:

- Nammineerluta uagut allafitsinniit illuaqqanik atukkiussiinikuunngilagut, kisianni nalunngilara ukioq takornarianik angalatitsisartut suleqatigalugit qimusseriartunut illuaqqat ilaat atorneqartarsimasut. Aammattaaq illuaqqanik piginnittut aamma namminneerlutik takkornarianik ilaqarlutik illuaqqaminnukartarsimapput, Pia Anning Nielsen oqarpoq.

Illuaqqat arfineq-marluusut Tasiilap eqqaani sumi tamaaniittut, 6 aamma 14 kvadratmeterisut angissuseqarput.