Tunumi nannunik nalunaaqutsersuilerput
Ilisimatusartut taamatut suliniuteqarnissaminnut periarfissaqalerput, tamaani ujaqqanik misissuisut umiarsuit qulimiguullillu atugaat atorluarsinnaagamikkik.
Ilisimatusartut nannut sinerissamiittut qulimiguulimmik nanisassavaat, ilisimajunnaarteriarlugillu qaammataasakkut nassitsissummik ikkussivigisassallugit. Tamatuma peqatigisaanik nannut ersarissumik qalipaammik normulerneqassapput, taamaalilluni nalunaaqutseriikkat unitsinneqaqqinnginniassammata aamma nannunniat nannut qaammataasanut aallakaatitsissuteqarnerat takusinnaaniassammassuk. Qalipaat normuliinermut atorneqartoq qaammatip ataatsip qaangiunnerani ersigunnaassaaq.
Atortut immikkukajaaq ittut nalunaaqutsersuinermi atorneqartut akisuusjupput. Nannup ataatsip aallakaatitsissusernera 100.000 koruunit missaannik akeqartarmat. Taamaattumik nannunniat Pinngortitaleriffimmit kajumissaarneqarput, nannut aallakaatitsissusikkat pisarinaveersaaqqullugit. Pisaqartoqassagaluarpalli Pinngortitaleriffik ingerlaannartumik nalunaarfigineqassaaq.
Tamatumunnga peqatigitillugu Pinngortitaleriffiup nannut nalunaaqutsikkat, nalunaaqutserneqarnerinit taamalu ilisimajunnaarsinneqarnerinit qaammatip ataatsip ingerlanerani nerineqarnissaat mianersoqqussutigaa.
Taamatut suliniuteqarnikkut Tunumi nanoqassuseq paasisaqarfigerusunneqarpoq. Ilaatigut nannunniartarneq nannut amerlassusaannut qanoq sunniuteqartarnersoq paaserusunneqarluni.
