Tunumi Kujataanilu inuusuttut ilinniarumalluinnarput
Akissutit ersersippaat inuusuttut affaasa missingi atuarfimmi naammassigunik Nuummut nunanulluunniit allanut aallarusuttartut. Pingaartumik niviarsiaqqat aallarusuttarput, tassami ilinniagaqarusukkamik, taama oqarpoq misissuinermik ingerlatsisoq lektor Rasmus Ole Rasmussen.
Tamatumani apeqqutaavoq inuusuttut amerlaqisut, nukappiaqqat niviarsiaqqallu, niviarsiaqqalli suli amerlanerullutik, ilinniagaqartuummata piukkunnarsarlutillu, tassa sulianik allanik angajoqqaamik suliarisimasaasa saniatigut ilinniagaqarusukkamik piukkunarsarlutillu.
-Inuusuttut taakkua apeqqutinut immersuineq malillugu aallassappata tamanna pingaartumik isorliunerusunut sunniuteqassaaq.
-Tamatuma kinguneri erseqqissumik takoreerpavut, arnat amerlanerujartuinnartut illoqarfinnut anginerusunut pingaartumillu Nuummut nuuttarmata, aammattaarli Kalaallit Nunaata avataani unammilligassarsiorlutik toqqaasarlutik, assersuutigalugu tamannarpiaq Savalimmiuni takuneqarsinnaavoq, tassa arnat inuusunnerusut amigaataajartulerlutik, tamannalu aamma Kalaallit Nunaanni pivoq. Tamanna kinguaassiorsinnaanermut sunniuteqarpoq, tassami arnat inuusunnerusut aallarpata taava meeqqat ikinnerusut inunngortalissapput taavalu inuiaqatigiillu amerliartorsimagaluartut amerliartorunnaarlutik, Rasmus Ole Rasmussen oqarpoq.
-Taava isorliunerusut inuusuttunut pilerinarnerulersinniarnissaat assut ilungersunassaaq.
-Inuusuttut maaniiginnartinnissaat utertinnissaalluunniit kissaatigineqarpat taava taakkununnga pilerinartunik periarfissiisoqartariaqarpoq. Illoqarfinni mikinerusuni nunaqarfinnilu suliffissat suliassallu inuusuttunut kajungernartut qulakkeerneqartariaqarput.
Tamakkua tassaasariaqanngillat avataani inissisimasunut soqutiginarsorisat, tassa pilersaarusiortunut naalakkersuinermillu sulialinnut, taakkua namminneq isumaqarmata nunaqarfimmi najugaqarnissami piniartuuneq aalisartuunerluunniit siunissaasut.
Taakkua allatut ajornartumik inuusuttut atugaannut inissittariaqarput paasillugulu sumiiffiit taakkua atatiinnassagaanni inuusuttunut suut kajungernarnerunersut. Niviarsiaqqat 1 procentinit ikinnerusut atuarfimmit naammassigunik nunaqarfimmi najugaqarusupput.
