Tunumi kommunit Nuummut kujataanulluunniit kommuninut ilanngunneqarsinnaalerput
Kommunit qanoq kattukkusunnerlutik toqqaanissaminnut periarfissaat amerliniarlugit Aaqqissuussaanermut Isumalioqatigiissitaliap Kommuninut katitanut sisamanut ilusiliaat ilutsinik pingasunik ilavaat. Tamannali sulianik kinguartitsiffiussanngitsoq Isumalioqatigiissitaliami siulittaasoq oqarpoq.
Kommuninut katitanut sisamanut ilusiliaq Aaqqissuussaanermut Isumalioqatigiissitaliap inuiaqatigiinnut siorna saqqummiuppaa oqallisigineqarluartartumik. KANUKOKA-p juunimi ataatsimeersuarnerani sisamanik kommunerujussuaqalernissaa qinikkat oqallisigingaatsiarpaat, kommunillu kissaataat tusaaniarlugit Aaqqissuussaanermut Isumalioqatigiissitaliap ilutsit pingasut nutaat ilassutitut maanna saqqummiuppaat. Ilutsit nutaat saqqummiunneqartut allaassutigineruaat tunup Nuummi kujataanilu kattussinnaanissaanik periarfissinneqarmat.
-Oqallittarnerni tikkuartorneqarnikuuvoq periarfissaasoq tunu kujataanut ilaatillugu aamma naleqquttutut isigineqarsinnaasoq. Aaamma Nuup Kommunianinngaanniit nalunaarutigineqarnikuuvoq ammaffigalugu tunu, tassa Illoqqortoormiut Ammassallillu kommunii, siunissami Nuummut ilaatinneqarsinnaasutut tikkuarlugit. Periarfissaq taanna ammaanneqarmat aamma taamaalillugu takutipparput. Taanna aalajangerfigineqassaguni taava innuttaasut qanoq amerlatigisut taamaalillugit kommunimi tassani tunulequtaasussaanersut, Aaqqissuussaanermi Isumalioqatigiissitami siulittaasoq Martha Labansen oqarpoq. Ilutsit nutaat saqqummiunneqartut sulianut kinguarsaataassanngitsut Martha Labansen-ip ilanngullugu oqaatigaa:
-Kommunit kattuffiata siulittaasuisa kiisalu naalakkersuisut suliakkermatigut, sulinissatsinnut ukioq ataaseq affarlu periarfissiissutigineqarpoq. Kingusinnerusukkut taava ukiup affaa ilassutigineqarmat taamaalilluta ukiarmanna suliarput naammassisussaavarput. Pilersaarutigut tunngavigalugit kingullermeersumik septemberimi ataatsimiittussaavugut, naqiterteriarutsigulu neriuutigivarput oktoberimi suliaq naqereerlugu tunniussinnaassallutigu, Martha Labansen oqarpoq. Aaqqissuussaanermut Isumalioqatigiissitamit pingaartinneqarpoq, siunissami kommunini angisuuni innuttaasut sapinngisamik amerlasuut tunulequtarineqarnissaat, taamaammallu iluseq siulleq sananeqartoq taamaalillugu qanoq iluarseriarfissaqarnersoq kissaatigisat tunngavigalugit saqqummiunneqarluni.
