Tunumi islandimiunik suleqateqarneq ingerlalluartoq
Pilersuisup Islandimilu nioqqutissanik pilersuisut ukiorpanngortuni suleqatigiinnerat naatitanik pisisartut, ingammik Tasiilami inuulluataarutigisarpaat.
Suleqatigiinneq taanna 1998-imili ingerlalluarsimavoq, naatitanik nutaanik immunnillu tunisassianik nutaanik isumaginnittuusimalluni. Isumaqatigiissut taanna Pilersuisup naammagisimaarluarpaa.
- Tunumik pilersuineq taanna naammaginarluinnartutut naleqqulluinnartutullu taarusuppara. Islandimik pilersuisuanillu suleqateqarnerput ajunngilluinnarpoq - oqarsinnaavugullu ukiuni kingullerni suleqatigiinneq pitsanngoriartuinnarsimasoq, nioqqutissallu pisartakkavut amerlingaluttuinnarput, kædedirektør Finn Fabricius oqarpoq.
Umiarsuup siulliup kingulliullu tikittarneri qaammatinik arfineq marlunnik akunneqarput
Erseqqissarpaalu taamaallaat ukiuunerani Pilersuisoq nioqqutissanik Islandimiit timmisartukkut pilersorneqartartoq.
Umiarsuup siulliup kingulliullu tikittarneri qaammatinik arfineq marlunnik akunneqarput, taamaattumik piffissap taassuma iluani timmisartukkut pilersuisanngikkutta nioqqutissanik nutaanik pilersuisinnaassanngikkaluarpugut.
Kædedirektøri oqarpoq nioqqutissat tassaanerusut naatitat assigiinngitsut, immunnik tunisassiat qallersuutissallu Tunumut timmisartuunneqartartut.
Pilersuisorli aamma ilaatigut naasunik assigiinngitsunik islandimiullu mamartuliaannik immikkuullarissanik, soorlu eqalussuaminernik misiliutitut tikisitsisartoq.
Pilersaarutit malillugit umiarsuaq kingulleq oktobarip pingajuanni Illoqqortoormiunut tikissaaq, Tasiilamut umiarsuaq kingulleq novembarip aappaanni tikittussaasoq, Royal Arctic Linep attaveqaqatigiinnermut pisortaa KNR-imut taama oqarpoq.