Tunumi ineriartortitsineq

Qinigassanngortittut tunumeersut tamaasa najukkaminni siuarsaasoqarnissaa qineqqusaarutigaat. Qinigassanngortittut mittarfiliortoqarnissaa pingaartippaat aammalu kommunimi borgmesterip tamanna kissaatigalugu. Qinigaaffimmi matumani kingusinnerusukkulluunniit tamanna anguneqassanersoq piffissap takutikkumaarpaa.
apriilip 02-at 2013 09:28

Kommuneqarfik Sermersuumi avanngarusimasumiipput, kommunillu kattussuunneqarnerisa kingorna Tasiilaq Ittoqqortoormiillu Kommuneqarfik Sermeruumi nunatsinni illoqarfiit pingaarnersaat Paamiullu kommuneqatigilerpai.

-Tasiilaq timmisartunut suluusalinnut mittarfittaartariaqarpoq, Tasiilap eqqaanilu angallannikkut pitsanngorsaaneq aqqutissiorneqaannarani aamma takornariaqarnikkut ineriartortitsinissaq annerusoq aammaanneqassammat. Takornariaqarnikkut periarfissagut Islandip tungaanut sammisutTasiilami mittarfeqalernitsigut siuarsarneqartussaapput. Eqqumiitsuliornikkut sanalukkanik nioqqutissiorneq aamma kulturikkut ingerlatsinerup siuarsarnissaa ilanngullugit ineriartortinneqassapput. Tasiilami Illoqqortoormiunilu ersarissumik immikkuullarissumik kulturikkut pigisaqarpugut tunumiuulluta tulluusimaarutigisatsinnik – tamakku atorluartigit, ineriartortillugillu,  Iddimanngiiu Bianco, IA tunuliaqutaralugu kommunimut qinigassanngortittoq kaammattuivoq.

Inuussutissarsiutinik ineriartortitsineq Tunumi tamakkiisumik pissariaqarfigineqassappat aamma ilinniatoqarnissa pisariaqarpoq, innuttaasut takornarialerinermut ilinniartinneqarsinnaanngorlugit. Mittarfiliortoqarpallu tamanna nunap immikkoortuani suliffissaaleqinermut aamma pingaaruteqartorujussuussaaq.

-Piniarnermik aalisarnermillu inuussutissarsiuteqarneq siuarsarneqartuartariaqarpoq, aalisakkanik nioqqutissiorsinnaaneq misissuiffigineqarluni siuarsarneqarlunilu. Tasiilaq illoqarfinni Nuummituulli nutserfiutigaaq, taamaattumik inissialiortitsinerit, minnerunngitsumik inuusuttut inissaannik sanaartorneq annertusartariaqarpoq. Inissialiornertigut suliffissaqartitsineq praktikkerfissallu aamma annertusarneqassammata, Iddimanngiiu Bianco oqarpoq.