Tunumi ilisimasassarsiortut saarnginik qangarnitsanik ujaasiniarput
Sisamavilinnik ilisimatusartut Jamesonlandimut qaammatip tulliani ilisimassarsiortussaapput, neriuutaasalu annersaraat sisamaviliup Grallatorip saarnginik nassaarsinnaassallutik.
Sisamavileeqqap taamaattup tumai kisiisa maannamut takuneqartarsimapput, taamaammat saarnginik nassaarnissaq kissaatigineqaqaaq.
Ilisimasassarsiortunik isumaginnittuuvoq GeoCenter Møns Klint, sisamavileeqqat ujarannguussimasut, ilisimasassarsiortut assaallutik neriuutigineqartutut nassaariumaagassaat, tassani 2013-imi saqqummersinneqassallutik.
Sisamavileeqqat Grallatorip saniatigut dinosaurit siulliit ilaasa saanikuliaanik ilivitsunik ilisimatuut assut nassaarusupput, nassaarerusutaasalu ilaat tassaavoq plateosaur, meterinik qulinik angissuseqartoq. Sisamavileeqqat timmisinnaasut saarnginik aamma pissarserusupput, kiisalu miluumasut nunarsuatsinni siulliit ilaasa, mikisuarannguit, ussunnaanut(spidsmus) assingusut, saarnginik aamma assut pissarserusullutik.
GeoCenteri Nunatta Katersugaasiviata suleqatigisimavaa, uumasullu ujarannguussimasut Danmarkimi saqqummersinneqareerpata Kalaallit Nunaannut utertinneqartussaapput.
Ilisimasassarsiortussat qallunaajupput, tyskit portugalimiulu ataaseq, aqutsisoraallu Lars Clemmensen. Taanna maanna ilisimasassarsiornissamut assingusumik 1980-ikkunni ilisimassarsioqataavoq, Tunumi dinosauruserpassuarnik aqqutissiueqisunik taamani nassaarlutik.
Ilisimasassarsiornissaq 7 millionit 8 millionit koruunillu akornganni akeqassaaq, aningaasaateqarfiillu arlallit aningaasaliisuupput.
Ilisimatuut Kalaallit Nunatsinnut juulip ulluisa qulinganni aallassapput.
