Tunumi dinosauit saarnginik ujaasilersut
Ilisimatuut Danmarkimeersut Tunuliassapput, dinosaurit ilaat phytosaurit niaquata saarnga tassani ujaarissallugu. Aviisi Jyllands-Posten taama allaaserisaqarpoq.
Phytosaurit saarngi ujarannguunnikut ilisimatuunit Tunumi Carlsberg Fjordenimi 2012-imi nassaarineqarput. Nassaarineqartulli ima pitsaatiginngillat suussusersineqarsinnaallutik, tassami saarngit nassaarineqartut Phytosaurit sorlernut ilaanersut ilisimatuut takusinnaasimanngimmassuk, ilisimatooq Ph.D. Jesper Milán, Geomuseum Faxemeersoq, Jyllands-Postenimut oqarpoq.
- Saarngit nassaarineqarnikut atorneqarsinnaanngitsutut nalilertariaqarpavut. Phytosaurimmi assigiinngitsut taamanikkut uumammata. Assigiinngissutaallu paasiniaraanni niaquisa saarngi misissorlugit paasineqarsinnaavoq, Jesper Milán oqarpoq.
Carlsberg Fjordenimi 21012-imi nassaarfiusumi taamaammat maanna uterniarput, tassanilu assaanialerlutik, Milán oqarpoq.
Carlsberg Fjordenimi nassaarineqartut ukiunik 220 millioninik pisoqaassuseqartut paasineqarnikuuvoq, dinosaurillu nunarsuarmi maannamut nassaarineqarnikut akornanni pisoqaanersaallutik.
