Angalasut, assersuutigalugu Ittoqqortoormiiliartussat apuuffissaminnut apuussinnaaqqullugit, Namminersorlutik Oqartussat Kulusummiit Nerlerit Inaannut ajornartoornermi silaannakkut angallassinissamik periarfissiivoq,

Tunumi ajornartoornermi angallassineq: Kulusummiit Ittoqqortoormiinut 10.540 koruuni

Ittoqqortoormiinukarniaraanni Island aqqutigineqaqqaartaraluartoq, Islandimut pisariaqanngitsumik angalasoqaqqusaanngilaq. Tamanna tunumut angalanermut akit marloriaatingajanngornerannik kinguneqarpoq.

Islandimi Coronavirus killilersimaaniarlugu nunanit allanit Islandimukarnianut sukaterisoqarmat Iceland Airip Tunumut angallassisarnini septembarip qaammataa ilanngullugu unitsikkallarpai.

Angalasulli, assersuutigalugu Ittoqqortoormiiliartussat apuuffissaminnut apuussinnaaqqullugit, Namminersorlutik Oqartussat Kulusummiit Nerlerit Inaannut ajornartoornermi silaannakkut angallassinissamik periarfissiivoq. Islandikkoornermiilli allaanerussuteqalaarpoq: Billetsit marloriaatingajammik akeqarput.

Nivi Lorentzen erninilu Tasiilamit Ittoqqortoormiiliarnissaminnut 11.540 koruuneerput.

- Ingasagilaarpara angalanissarput taama akisutigisinnaammat. Islandikkut angalanissaraluarput manna akiusup affaannaanik akeqaraluarami, Nivi Lorentzen oqarpoq.

 

AAMMA ATUARUK Islandimut pisariaqanngitsumik angalasoqaqqusinngitsoq – ima ilinnut sunniuteqarsinnaavoq

Taassuma erni ataatsimik ukiulik Islandikkoorluni Ittoqqortoormiuliaqatigisussaagaluarpaa, tamatumunngalu 6.300 koruunit akiliutigalugit. Angalanissarli taamaatimmat Namminersorlutik Oqartussat aqqummut pilersitaannut 11.540 koruuneertussanngorpoq. Billetsisiniaqqaaramili 21.300 koruuneertussanngoraluarpoq.

- Soormita taama akisutigisoq? Paasisinnaanngilara taannartaa sooruna taama akisutigisoq aali akunnerit marluinnaat ingerlasussaasugut. Kulusimmiit Islandikkut miffissagut aali marluugaluartut, marloriaataa sinnerlugu akeqarnera ingasagilaarpara, taanna oqarpoq.

Coronavirus angalasunut aporfiliisoq

Timmisartumik qulingiluanik ilaasoqarsinnaasumik King Airimik Kulusummiit Nerlerit Inaannut sapaatit akunnerat allortarlugu timmisartuussisoqartassaaq. Taava aamma Dash-8 37-nik ilaasoqarsinnaasoq sapaatit akunneri sisamakkaarlugit angallassisassooq.

 

AAMMA ATUARUK Islandimut tikinnermi malittarisassat sukannernerulissasut

KNR-ip angalaneq sooq taama akisutiginersoq Air Greeenland aamma attaveqatigiinnermut naalakkersuisoqarfik aperai. Taakkuali Corona pillugu allattoqarfimmut innersuussipput, tassanngaanniillu akissut aana:

- Angallassineq maanna ingerlanneqartoq ajornartoornermi aaqqiineruvoq. Angallassisarnerit nalinginnaasut saniatigut aqqut nutaajuvoq, taamaammallu imminut akilertussaalluni, Corona pillugu allattoqarfiup aqutsisua, Nels Ulrik Vinther KNR-imut paasissutissiivoq.

Tassalu ilaasut namminneerlutik angallaffimmut aningaasartuutit matussusissavaat. Taamaammanuna taama akisutigisut, taanna ilisimatitsivoq.

Meeqqap angalanera 10.000 koruunilik

Nivi Lorentzenip Islandikkoorluni angalasinnaajunnaarluni paasigamiuk, Air Greenlandimut billetsisisariaqalerpoq. Angallavissallu misissorlugit akinut tupassimaqaaq.

Ernerminut billetsi siumuinnaq 10.000 koruuneqarpoq, Tasiilamiillu Ittoqqortoormiinukarniaruni 21.300 koruuneertussanngorluni.

- Mailissutigigakku taanna ingasagalugu. Sunagooq tamarmi tassanngaannariataarnikuummat, tassa Islandikkut angalanissaq matunikuulluni, akimik tunniussiinnapajussimagamik meeraaqqamut akit eqqarsaatigeqqaarnagit, taanna oqarpoq.

Naammagittaalliutaanut akissut KNR-imit atuarparput. Tassani Namminersorlutik Oqartussat meeqqanut billetsit akii suliap suliareriataartariaqarnerani eqqumaffiginngitsoorsimallugit nassuerutigaat.

Namminersorlutik Oqartussat innuttaasut assingusumik misigisaqarsimasunut saaffiginninnissamik kaammattuipput.00:04:14

Nivi Lorentzen naammagittaalliuteqareersorlu erneranut billetsip akia 1.000 koruuneertussanngorlugu aaqqinneqarpoq.

 

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat