Ilisimatooq: Tunumi aarluit mingutsitsinermeersunik PCB-nik ulikkaarput

Aarluit Tasiilap eqqaaniittartut mingutsinneqangaatsiartunut ilaammata nerineqannginnissaat ilisimatuut siunnersuutigaat.

Aarloqatigiiaat 19-it misissuiffigineqartut affaannit amerlanerusut ukiuni 30-40-ni aggersuni nungutinneqarnissaat aarlerinarpoq.

Nunanit assigiinngitsunit ilisimatuut, ilaatigut nunatsinni Pinngortitaleriffimmeersut misissuineranni atuagassiami Sciencemi saqqummersinneqartumi taama allassimavoq.

Aarluit avatangiisinut mingutsisartumik PCB-mik timimioqaleriartuaartarnerat tamatumunnga pissutaavoq.

PCB kinguaassiorsinnaajunnaartitsisarpoq, hormoninut akornutaasarluni, uumasuni akiuussutissaq annikillisittarpaa toqusoqarnerulersarlunilu. Ilisimatuut aarluit mingutsinneqarnerpaat kinguaassiorsinnaajunnaarsimasoraat.

AAMMA ATUARUK Spækhuggeren det mest forurenede dyr i Arktis

Aarluit PCB-mik mingutsinneqarnerpaapput taakkumi nerisareqatigiiaanni qullerpaamiipput. Avatangiisinut mingutsitsinerit imaani uumassutsinit mikinerusuniilertarput. Taakku Aalisakkanit PCB-mik aamma sunnerneqartunit nerineqartarput. Aalisakkallu puisinit nerineqartarput naggataatigullu puisit aalisakkallu aarlunnit nerineqartarlutik, taamaalilluni timaanni PCB annertoorujussuanngortarpoq.

Tunumi aarluit natsersuarnit PCB-mik 100-eriaammik akoqarnerupput aarlunnilu mingutsitsiffiusimasuni mingutsinneqarnerpaat ilaanniillutik.

Avatangiisinut mingutsitsinerit qaffasinnaatsiarnerat pissutigalugu aarluit inunnit nerineqannginnissaat ilisimatuut kaammattuutigaat.