Tunumi aalisarneq siuarsarniarneqarpoq
Tunup sineriaani aalisarneq siuarsarniarlugu Savalimmiuni angallatinik umiatsianillu tuniniaasartoq aamma Ammassallip kommuniani inuussutissarsiornermut ineriartortitsinermullu pisortaq Aalborgimi aalisarneq pillugu tuniniaanermi takutitsinermilu napeqatigiipput.
Tunumi aalisarnerup siuarsaavigineqarnissaa anguniarlugu umiatsianik angallatinillu aalisarnermut atorluarsinnaasunik Ammassallip kommunea paasisassarsioqqammerpoq.
Ammassallip kommuneani inuussutissarsiutigalugu piniartut 180/t missaaniipput angallatitaarniartullu iluatsitsisinnaassappata saarullinnik, qeeqqanik, nataarnanik suluppaakkanillu aalisartoqalersinnaassaaq tunumilu aalisartunngorsaasoqarsinnaanngussalluni.
Pilersaarut piviusunngussappat tunumi suliffissaqartitsiniarnikkut iluaqutaassaqaaq, Ammassallip kommuniani inuussutissarsiornermut ineriartortitsinermullu pisortaq Thorkild Nielsen radioaviisimut oqarpoq.
Angallatinik aalisariutaasinnaasunik pisisinnaalernissaq piniartunit soqutigineqarluartoq Thorkild Nielsen oqarpoq. Aalborgimilu naapeqatigiinneq naammasseriarpat inuussutissarsiornermut ineriartortitsinermullu pisortaq Namminersornerullutik Oqartussanut allagaqartussanngussaaq pilersaarutigineqartormi piviusunngussappat Namminersornerullutik oqartussanit aningaasaleeqataasoqarnissaa avaqqunneqarsinnaanngimmat.
Angallatinik pisiniarnissaq pivisunngorsinnaassappat aalisartut peqatigalugit piginneqatigiilersinnaanissaq ammaffigineqartoq, Savalimmiuni angallatinik umiatsiaaqqanillu tuniniaasartoq, Adalstein Anthoniussen oqarpoq, Adalstein Anthoniussen aamma oqarpoq Sisimiuni namminersortoq suleqatigalugu angallatinik umiaqqaanillu maajimili misileraasoqarlersimasoq. Sinerissap qanittuani aalisariutit assiginngitsunik angissusillit savalimmiormiuniit tuniniarneqarput.
Aalisarnermut naalakkersuisuugallartoq Hans Enoksen oqarpoq Namminersornerullutik oqartussanit massakkut aningaasaliisoqarsinnaasoq oqaatigisinnaanagu taamaattorli tunumi aalisartunngorsaanissaq siuarsaaviginiarneqassappat tunngaviatigut isumaqataaffigalugu.
