Tunuarsimaarnerat eqqarsarnartoqartippaa

Siumup siulittaasuata Hans Enoksenip ingerlatsinera kiisalu akit assigiikkunnaarnissaat pillugu Siumumi immikkoortortaqarfiit isumaannik allakkatigut immikkoortortaqarfinnut 72-inut paasiniaanitsinni taamaallaat sisamat akissuteqarput.

Immikkoortortaqarfiit akissuteqarnissaminnut tunuarsimaarnerat qulaaninngaannit aqutsisoqarneranik takussutissiisoq, taamaanneralu eqqarsariaallannartoq oqaluttuarisaanermut ilinniagartooq Ilisimatusarfimmilu ilinniartitsisoq Daniel Thorleifsen isumaqarpoq.

- Isumaqaqqajaanarsivoq, partiip qulaaninngaannit aqutsisoqartoq. Oqallinnissaraluaq partiimi siuttunut tunniussimavaat, tassanilu isumaqarpunga eqqarsarnartua, Daniel Thorleifsen tunngavilersuivoq.

Immikkoortortaqarfiit 72-it akornanni sisamat akissuteqarput, taakkungannga marluk siulittaasoqarfimmut innersuussillutik. Isummersuuteqartut tassatuaapput Siumut Nuugaatsiaq aamma Siumut Qaqortoq. Siumut Nuugaatsiaq isumaqarpoq, Hans Enoksen pikkoriffeqartoq sanngiiffiilu takujuminaatsillugit, akilli assigiikkunnaarnissaannut Naalakkersuisut paasisitsiniaanerat pipallataasutut nalilerpaa, nunaqarfiit eqqorneqarnerpaasussatut isigigalugit. Siumut Qaqortoq isumaqarpoq, Hans Enoksenimut tunngasut partiip aappaagu ataatsimeersuarnissaani aatsaat akineqartariaqartut, akilli assigiikkunnaarsinneqarnissaasa atuutilernissaa kinguartinneqartariaqaraluartoq.

Tamanna pillugu Daniel Thorleifsen isumaqarpoq, Siumup aappaagu ataatsimeersuartitsinissaa eqqarsaatigalugu, immikkoortortaqarfiit soorlu akit assigiikkunnaarnissaannut oqallinnermut siulliullutik peqataasariaqaraluartut.

- Tassani partiip iluani avissaartuutsitsisoqarsinnaaneranik anningaalasoqarnera pissutigalugu oqallittoqarumannginneranik naliliisoqarsinnaavoq, eqqumiilaarpoq, qullersaqarfimminngaannit nipangersitaasimanerpat imaluunnit nammineq oqarusussimannginnerpat. Taamaattumik demokratii atorlugu isigissagaanni taama pissusilersorneq isumaqarpunga utoqqatsinartuusoq, Daniel Thorlefsen naliliivoq.