Arctic Ravenimi pisortaq, Aksel Cortzen-Blytmann, Tunumi umiarsuarmik tunitsiviliinissamut piareersimasuuteqarpoq, Namminersorlutillu Oqartussat qinnuteqaammut akuersinissaat utaqqiinnarpaa.Assi: Aksel Blytmann

Qulaarpaa Tunu umiarsuarmik tunitsiveqalernissaa neriuutigineqartoq

Umiarsuarmik tunitsivimmik tikisitsipallagitsi. Tunumiit taama oqariartuuteqarput. Najugaqarfiit eqqaanni aalisagaqarluartoq, nunaqartut oqarput, tunitsivissaqanngilarli.

- Taamaammat massakkut tunisisinnaasut arlaqarput. Taavalu massakkut aamma saarulliit eqqatsinni amerlanerlernikooqaat. Tunisassiarissallugit naammapput, Kulusummi niuertoq nunaqarfimmilu siulersuisuni ilaasortaq, Bendt Abelsen taama oqarpoq.

Umiarsuarmik tunitsivimmik piaartumik Tunumukartoqarnissaa taassumap neriuutigaa.

- Umiarsuarmik tunitsivimmik Kulusuup eqqaani atorfissaqartitsivugut. Umiarsuaq tunitsivik siorna iluatsikkaluarparput, Bendt Abelsen oqarpoq.

Kuummiuni tunitsivik matuneqarnikuummat, Tunumi maanna tunitsivissaqanngilaq.

Aamma atuaruk  Qulaarpaa Tunumi aalisakkanik tunitsivituaq ammaqqissagunartoq

Tunumilu suliffissaaleqisorpassuaqarmat, tunitsiveqalernissaq pisariaqarluinnartoq, Bendt Abelsenip ilanngullugu oqaatigaa.

Taanna oqaluttuarpoq, tunitsiveqanngippat kommuni kisimi isumalluutaasoq. Kommunimut nerisassarsiutissanut qinusoqarsinnaavoq, allamik naamik.

Tunumi umiarsuarmik tunitsiveqalernissaq pillugu Piginneqatigiiffik Arctic Raven, namminersorlutik oqartussanut qinnuteqarsimasoq, suliffeqarfiup pisortaa, Aksel Cortzen-Blytmann, oqaluttuarpoq.

- Umiarsuaq savalimmiuneersuuvoq, uagullu nammineq qassutinik bundgarninik tallimanik peqarpugut, inuttassatta - tassa tunumi aalisartut atorsinnaasaat - taamasilluta tunisassaqarluarnerussagatta aalisartullu aningaasarsiulerniassammata, Aksel Cortzen-Blytmann.

Aamma atuaruk  Qulaarpaa Tunumi takornariaqarneq suliffissanik pingaartunik pilersitsisinnaasoq

Suliffeqarfik 67-inik Tunumeersunik ilaasortaqartoq, umiarsuarlu aallariaannaasoq namminersorlutilli oqartussat akuersinissaat utaqqiinnarneqartoq, suliffeqarfimmi pisortaq oqarpoq.

Arctic Raven umiarsuarmik tunitsiveqalernissaq pillugu Namminersorlutik Oqartussanut qinnuteqarsimasoq, qinnuteqaallu naalakkersuisoqarfimmi maanna suliarineqartoq, Aalisarnermut Naalakkersuisoqarfimmi pisortap, Emanuel Rosingip uppernarsarpaa.

Aamma atuaruk Aalisakkanut tunitsivituaq matoqqavoq

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat