Tunu kiassuaarpoq

Tunu ukiormanna aatsaat taama kiatsigaaq. Tamatuma kinguneranik sermit siornatigumut naleqqiullugit aakkiartornerupput uukkaanerullutillu.
Allattoq Elisa Isaksen
septembarip 20-at 2010 05:40

Nittartakkami videnskab.dk-mi taama allaaserinnittoqarpoq.

Kiassutsip ukiuni kingullerni 50-ini agguaqatigiissinnerani, qaammatini juunimi, juulimi aggustimilu agguaqatigiissullugu 0,5 aamma 1,5 gradit akornanni kianneruvoq.

Tamannalu isaannarmik takuneqarsinnaavoq. Soorlu aput juunimi juulimilu aareersimavoq, naak aatsaat aggustimi aattaraluarluni.

Aamma sermeq Mittivakkat ukiormannaannaq 35 meterinik aannerusimavoq. Nalinginnaasumik sermeq taanna ukiuni kingullerni 75-ini 17-18 meterinik aakkiartortarsimagaluarpoq.

Uuttortaanerit naatsorsuinerillu ersersippaat, ukiormanna aakkiartornera ukiut 75-it ingerlaneranni aakkiartorneranit annertunerusoq.

Aasap kiannerata sermeq aakkiartortiinnarnagu aamma uukkaatittarpaa. Sermip taassuma ukiuni 40-ni alaatsinaanneqarnerani, ukiormanna aatsaat taamaalisoq oqaatigineqarpoq.