Tunu Islandimit pilersorneqalissagunarpoq
- Siunersuuteqarluni soorunami taama tunuliaqqutersorneqarneq nuannersorujussuuvoq. Aamma uani eqqaamassavarput, nunap pingasut suleqatigiinnerminni taanna siunersuut akuersaarlugu Naalakkersuisunut nunatsinni Islandimilu isumageqqullugu inassutigimmassuk.
Josef Motzfeldt taama oqarpoq. Ukioq manna Josef Motzfeldtip Tunumi innuttaasut oqaloqatigai, innuttaasullu pilersorneqarnerminnut atatillugu allannguuteqartitsinissamut siunersuusiorsimapput.
Josef Motzfeldt oqarpoq, Tunu Islandimit pilersorneqalissappat, Tunumi innuttaasut naatsorsuutigisinnaassagaat pisiarisartaligassatik akikinnerullutillu pitsaanerussasut.
- Innuttaqatitta Tasiilami eqqaanilu, Ittoqqartoormiuni eqqaanilu siunissami qularnanngilaq akulikinnerusumik aammalu akikinnerusumik nioqqutissat inuussutissallu assigiinngitsut, sanaartornermilu atugassat pissarsiarisinnaanngorumaaraat.
Ullumikkut Royal Arctic Line nioqqutissanik kisermaassilluni Tunumi pilersuisuuvoq, kisermaassinerli allanngortinneqarsinnaasoq Josef Motzfeldtip oqaatigaa.
- Ukioq allortarlugu Naalakkersuisut umiarsuaatileqatigiillu isumaqatigiinniartarput isumaginninneq qanoq ittoq umiarsuaatillit suut naammassissaneraat. Taamaammat imaappoq, allanngortinneqarsinnaanera periarfissaavoq. Naalakkersuisut isumaginiagassaasa qularnanngilaq pitsaanerpaaq aammalu nunatsinni innuttaasunullu atoruminarnerpaaq nassaariniartussaassavaat.
Piviusorsiortuunngitsoornavianngilaq naalakkersuinikkut isummat innuttaasut pitsaanerusumik atugaqalernissaannik siunertaqartumik naammassiniarneranut suliakkiissuteqartoqarpat.
IA, Demokraatit Kattusseqatigiillu siunersuut akueraat, illuatungiliuttuni partiit aamma Tunup Islandimit pilersorneqalersinnaanera akueraat.
Siumumilli Islandimiit pilersuisalernissaq Tunumiinnaanngitsoq, Kalaallilli Nunaat tamakkerlugu pilersorneqalersinnaanera misissuiffigineqartariaqartoq siunersuutigineqarpoq
Atassutip siunersuut nangaanartoqartippaa, pilersuineq qanoq akeqassanersoq Atassutip misissorteqqaarusuppaa.
Islandip Tunumut pilersuilersinnaaneranik siunnersuut oktobarip 27-anni Inatsisartuni aappassaanneerneqassaaq.
