Tunngaviusumik inatsit sivisuumik eqqartorpaat
Folketingip nunanut allanut tunngasunut ataatsimiititaliaata, aamma Illersornissamut ataatsimiititaliap, Inatsisartut Nunanut Allanut Sillimaniarnermullu Ataatsimiititaliaat siulliullutik ataatsimeeqatigaat. Tamatuma kingorna Folketingip Kalaallit Nunaat pillugu ataatsimiititaliaa ataatsimiippoq.
Kalaallit Nunaatalu tunngaviusumik inatsiseqalersinnaanissaa oqallisigineqangaatsiarpoq, Folketingimilu inatsisartunilu politikeritt ataatsimiinnerat minutsinik 15-nik sivitsorneqarpoq oqaatiginiakkat tamakkerniassammata, Sara Olsvig Folketingip Kalaallit Nunaat pillugu ataatsimiititaliaani siulittaasoq oqarpoq.
Ataatsimiinnerniilli oqaatigineqartut ingerlateqqinneqaqqusaanngillat, taamaattumik ataatsimiinnerni qanoq oqartoqarsimanersoq oqaatigiumanngilaa. Erseqqissaatigaluguli tunngaviusumik inatsiseqalernissamut suliniut upernaakkut 2013-imi maani Nunatsinni isumalioqatigiissitaliornikkut aallarnisarneqartussap oqallisigineqarneranut aallarnisaataannaasoq.