Tunngaviusumik inatsisitaarnissaq isummersorfigaat
Nunarput namminerisaminik tunngaviusunik inatsiseqartariaqarpoq, ulloqeqqanut radiuaviisimi taama oqarpoq folketingimut ilaasortaq, Lars-Emil Johansen, Siumut. Partiit Inatsisartuni ilaasortaatitaqartut tamatumunnga tapersersuinersut paasiniarpavut.
Danskit tunngaviusumik inatsisaat pisoqaavoq nutaangililluinnarsimasoq ullumikkumut ukiuni 158-ini atuutereersimasoq. 1953-imiilli nunatsinnut aammattaaq atuuttuuvoq, kisianni isumaqatigiissutigineqartoq tassaagunarpoq Kalaallit Nunaat namminersortoq namminerisaminik tunngaviusunik inatsiseqartoq, qanorli pilertortigisumik tamatuma pinissaa assigiinngitsunik isumaqarfigineqarpoq.
Lars-Emil Johansen, Siumut ulloqeqqanut radiuaviisimi oqarpoq nunatta namminersulernissaanut inatsisit tunngaviusut aporfiunerpaasut, oqarlunilu Namminersorneq pillugu ataatsimiititaliarsuaq kalaallit tunngaviusumik inatsisissaannik piareersaalluni aallarnisaasuusariaqartoq.
Kisianni Siumup siulittaasua naalakkersuisut siulittaasuat Hans Enoksen tamatumunnga isumaqataanngilaq. Taanna oqarpoq Lars-Emil Johansenip siunnersuutaa ataatsimiititaliarsuup suliassaata avataaniittoq.
Akerlianik IA-p siulittaasortaava Kuupik Kleist folketingimi ilaasortaqatiminut isumaqataavoq:
- Tamatumani pisariaqassaaq danskit tunngaviusumik inatsisaannit avissaarnissarput. Eqqaamasariaqarpoq inuiaat kalaallit nammineerlutik peqataaffiginngisaannik tunngaviusumik inatsisinut ilanngutsinneqarmata. Aamma ukiorpassuarni danskit naalakkersuisuusartut nikerartut inatsisit tunngaviusut atorlugit kalaallit namminneq oqartussaarusunnerat killilersorniartarsimavaat, Kuupik Kleist oqarpoq.
Demokraatit naalakkersuinermut tunngasunut oqaaseqartartuata, Palle Christiansenip Lars-Emil Johansenip oqariartuutaa “tusaqqusaarnerinnaasoq” oqaatigaa:
- Nunarput naalagaaffeqatigiinnermut suli ilaatillugu danskit tunngaviusumik inatsisaasa ataaniippoq, Palle Christiansen oqarpoq.
Demokraatinut ilaasortaasimasoq maannalu attaviitsoq Esmar Bergstrøm tamatumunnga isumaqataalluinnarpoq:
- Isumaqarpunga ajornartorsiuterpassuit allat aaqqiivigeqqaartariaqarivut, Esmar Bergstrøm oqarpoq.
Anthon Frederiksen Kattusseqatigiit Partiiata siulittaasua ima oqarpoq:
- Inuiannut kikkunnulluunniit imminnut oqartussaaffigerusuttunut nammineq tunngaviusumik inatsiseqalernissaq anguniagassaavoq. Tamannali uatsinnut atatillugu aqagu pinavianngilaq, Anthon Frederiksen oqarpoq.
Atassut tunngaviusumik inatsisinut qanoq isumaqarnersoq paasiniarlugu atassuteqarfiginiaraluaratsigu ualimut iluatsitsinngilagut.
