Assi: Agnieszka Ruminska/Flickr

Tunngaviusumik inatsisitaarnissaq Danmarkip tunngaviusumik inatsisaanut akerliussanngitsoq

Lagtingi inatsisiliortusussaasuusutut oqaatiginnittumik Savalimmiut tunngaviusumik inatsiseqalerpata, tamanna Danmarkip tunngaviusumik inatsisaannut akerliussanngilaq. Tamanna Danmarkimi inatsisilerinermi professorip naqissuserpaa.

- Oqartoqarsinnaavoq, Folketingi inatsisiliortutut piginnaatitaaffigisaanik namminersorneq pillugu inatsisiliornikkut Kalaallit Nunaat Savalimmiullu suliakkinneqarsimasoq, Aarhusip universitetiani inatsisilerinermi professori Jørgen Albæk Jensen oqarpoq.

Savalimmiunili inatsisartut Folketingi naliginngilaat. Savalimmiut naalagaaffeqatigiinnut ilaatillugit Folketingi pissaaneqarnerpaajuvoq, Savalimmiullu tunngaviusumik inatsiseqalissappata tamanna allangornavianngilaq.

- Savalimmiormiut illuinnaasiorlutik oqarsinnaanngillat, oqaaseq inatsisiliortuuneq ima paasineqassasoq, savalimmiormiut inatsisiliaat naggaterlerpaakkut atuuttuusussaasut. Taamaaliorneq Inatsimmik Tunngaviusumik unioqqutitsinerussaaq, Jørgen Albæk Jensen KNR-imut oqarpoq.

Aamma atuaruk Savalimmiormiut tunngaviusumik inatsit pillugu taasilersut

Savalimmiormiut tunngaviusumik inatseqalernissaat, Danmarkip tunngaviusumik inatsisaannut akerliunngippat, danskit naalakkersuisuisa tapersersoraat, Danmarkip ministeriunerata, Lars Løkke Rasmussenip, Naalagaaffeqatigiit ataatsimiinneranni aprilip qaammataani naqissuserpaa.

Taamaattumillu siunertaasimagaluarnersutut Savalimmiut tunngaviusumik inatsisissaani Savalimmiut kunngiitsuuffittut suaarutigineqarsinnaanngilaq.

- Danmarkip tunngaviusumik inatsisaanni kunngeqarfiunera erseqqissumik allaqqammat taamaliortoqarsinnaanngilaq. Namminerisamik tunngaviusumik inatsisiliornikkut tamanna qulaatiinnarneqarsinnaanngilaq. Aammami taamaaliorniarunanngillat, assersuutaannaagunartoruna, Jørgen Albæk Jensen oqarpoq.

Pilersaarutit malillugit, tunngaviusumik inatsisissatut siunnersuut savalimmiormiut aappagu ukiakkut taasissutigisassaat, suli piareerneqanngilaq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl