Tunitsivissaqaqqilerput

Arctic Green Food A/S-ip pisortaa Tønnes Berthelsen ima oqarpoq, ingerlatsisussaq atorfinitsinneqareertoq tigooqqaanissaminullu piareeqqasoq.

- Tassa piniartut mattammik maannakkut tuniniaarusukkunik tuniniaasinnaanngorput. Tunisalli Itoqqortoormiuniit assartornissaat aporfiuvoq, umiarsuaq kingulleq aallareermat. Kisianni Timmisartumik assartornissaat siunertaralugu Air Greenland aamma Iceland Air oqaloqatigavut, mattak taamaalillugu Kitaanut silaannakkut assartoerneqassaaq, Tønnes Berthelsen oqarpoq.

Ittoqqortoormiut kangerluaumimmaqarluartoq ilisimanearpoq, kisianni Arcitc Green Food A/S-ip umimmaap neqaanik tunisassiornissaq pilersaarutiginngilaa.

- Umimmaat neqaat kitaani ukioq pisiavut suli nungunngillat. Aamma Ittoqqortoormiuni aamma piniarfiup ungasinera aporfiuvoq, uumasullu nakornaanit piumasaqaatigineqarpoq, umimmak pisarineqaruni sivisunerpaamik ullup ataatsip ingerlanerani tnitsivimmut apuunneqariissasoq, Arctic Green Food A/S-ip pisortaa.

Qilalukkap mattaqarallartillugu taakkuninnga tigooraaneq ingerlaannassaaq, Tønnes Berthelsen-ilu neriuutigaa, qilalukkat qaangiuteriarpata, tunitsivik puisi amiinik suliarinnissinnaasunit attartorneqassasoq atorneqassasorluunniit.