Tunitsivinnut tapiissutissanik 2 millioni koruuninik qinnuteqarput

Naalakkersuisunut ilaasortat Ane Hansen kiisalu Jens B. Frederiksen tunitsiviit imermut innaallagissamullu atuinerannut 2 millioni koruuninik tapiissuteqassallutik Aningaasaqarnermut Ataatsimiititaliamut qinnuteqarput. Tapiissuteqarnermi saarulliit akiisa 75 ørenik qaffaavigineqarnissaat naatsorsuutigineqartoq, Naalakkersuisunut ilaasortaq Ane Hansen oqarpoq.
Allattoq Oline I. Olsen
juulip 14-at 2009 10:23

Tapiissutissanik qinnuteqarnermi piffissaq qaninnerusoq eqqarsaatigalugu aaqqigallarnerusoq, Ane Hansen oqarpoq.

- Tassa pilersaarusioratta piffissaq qaninneq isigalugu aaqqiigallarnerit kingullersarivaat, piffissarlu ungasinneq isigalugu aalisarnermut politikki aqqutigalugu aalisartut atugarisaat pitsanngorsaavigissallugu suliniuteqarpugut, Ane Hansen oqarpoq.

Saarulliit akiisa qaffaavigineqarnissaat anguniarlugu tunitsivinnut tapiissutissanik qinnuteqartoqarpoq, Saarulliit akiisa minnerpaaffilerneqarnissaat naalakkersuisoqatigiinnit ornigineqanngitsoq.

- Akinik minnerpaaffiliiniaraanni inatsisiliortoqartariaqarpoq, uanilu aasaanerani inatsisiliortoqarsinnaanngilaq inatsisartut ataatsimiinngimmata. Naalakkersuisoqatigiinniit akinik minnerpaaffiliinissaq tunuarsimaarfigivarput, tassami nunani allani akinik minnerpaaffiliiffiusuni maanna nunarsuarmi aningaasarsiornerlunnerup kingunerisaanik taakkununnga nunanut akisoorujussuanngornikuummat, Ane Hansen oqarpoq.

Aalisarneq pillugu inatsisissatut siunnersuut Inatsisartut ukiaru ataatsimiilerpata siullermeerlugu suliarissavaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq