Tunitsivimmik umiarsualiisoqarnera Kujallermi suliffissaqartitsissasoq
Umiarsuaq tunitsivik Ilivileq Arctic Prime Fisheriesimit pigineqarpoq, ingerlatseqatigiiffiullu ningittagarsuutaa Nanoq Nanortalimmi suliffissuarmut aamma saarullinnik tulaassuivoq, 35-45-nut suliffissaqartitsilluni.
Borgmester Kiista P. Isaksenip umiarsuup tunitsiviup Ilivilip tulaassuisussanngornera pillugu Arctic Prime Fisheries nersualaarpaa.
- Arctic Prime Fisheries-ip taamaaliornermigut takuteqqippaa naleqarnerulersitsinissamik suliffissanillu pilersitsinissamik neriorsuutigisaminik timitaliisinnaassuseqarnini, borgmesteri tusagassiorfinnut nalunaarummi ilaatigut taama oqarpoq.
Borgmesterip suliffissanik pilersitsisoqarnissaa qilanaarivaa, tamanna isumaginninnikkut aningaasartuutit ikilisinnerinik akileraarutitigullu isertitaqarnerulernissamik kommunimut aningaasakilliortumut qulakkeerinnissammat.
Tamatumunnga atatillugu Kiista P. Isaksenip Naalakkersuisut ukioq manna aalisagartassiinermut tunngatillugu paamaarussinerat isornartorsioqqippaa.
Kujataani aalisartut aappaagumut aalisagartassanik agguaassisoqalerpat tunineqarnissaat neriuutigalugu Kommune Kujallermi borgmesterip oqaatigaa.
- Neriuutigeqaara Naalakkersuisut qulakkiissagaat Kujataani aalisarnermik ingerlatsisut ingerlatsiniartullu nunap immikkoortortaani suliffissanik pilersitseqataanissaannik periarfissiillutik, Kiista P. Isaksen taama oqarpoq.
