Tunitsiviit ingerlatserusuttunut tunniuteqquaat
Aalisakkanik tunitsiviit matoorarnikut uninngatiinnarnagit nammineerlutik ingerlatserusuttunut ajornannginnerusumik tunniunneqarsinnaasariaqarput. Taama isumaqarpoq Kattusseqatigiit Partiiat sinnerlugu Inatsisartuni ilaasortaq, Jakob Skade.
Allattoq Elisa Isaksen
Kattusseqatigiit Partiiat isumaqarpoq, aalisakkanik tunitsiviit ukiuni qulini kingullerni matoorarneqartut uninngatiinnarnagit nammineerlutik ingerlatserusuttunut tunniussuunneqartariaqartut.
Taamaattumik Jakob Skadep kajumissaarutigaa, nunaqarfinni tunisassiorfiit ilaat matoorarneqarsimasut nammineerlutik ingerlatserusuttunut piaartumik tunniunneqartariaqartut.
Taamaattorli tunniussivigineqartussat tassaasariaqarput, pisortanit aningaasatigut tapiiffigineqaratik tunitsivinnik nammineerlutik ingerlatsisinnaasut, Jakob Skade oqarpoq.