Tunitsiviit ilaat namminersortunit tiguneqarnissaat KNAPK-mit siunnersuutigineqarpoq

Nunatsinni tunitsiviit ilaat namminersortunit tiguneqarsinnaasariaqarnerat, KNAPK-p tungaanit aamma pingaartinneqarpoq. Tassani pingaartumik aalisakkanik tigooraaviit suliffeqarfissuarmit matuneqaqqajaasut, matuneqarsimasut uninngaannalersimasullu, piumasaqaatitaqanngitsumik namminersorniartunut tunniunneqartariaqarnerarlutik.

KNAPK-mit oqaatigineqarpoq, siornatigut tunitsiviusimasut uninngatiinnarneqartut, namminersortunit ingerlanneqalersimasut, maannamut takutikkaat, aalisakkanut tunitsiviit nunagisap aalisarnikkut avatangiisillu periarfissarititaannut naleqqussarsimasut, imminut akilersinnaasut.

- Taamaaliornikkut Nunatsinni suliffissat amerlissapput, aamma aningaasat Nunatsinni kaaviiaartut amerlanerulissapput nunallu inui namminersortunngorsaanermi peqataatinneqalissallutik, Leif Fontaine allappoq.

Taamaattorli Sulinermik Inuussutissarsiutillit Kattuffiata SIK-p, KNAPK aamma Namminersorlutik Oqartussat Royal Greenlandimik namminersortunngorsaaniarnerat siusinnerusukkut isornartorsioreerpaa, taamaaliornikkut tunitsiviit amerlanerusut matuneqarnissaat ernummatigigamikku.

- Tamatumammi kingunerissavaa, ilaasortarpassuatta aamma KNAPK-p ilaasortaasa suliaminnik inuussutissarsiutiminnillu annaasaqarnerat, SIK-p siulittaasua Jess G. Berthelsen siusinnerusukkut taama oqarpoq.