Tunitsiviit arfineq pingasut matoqqasut
Taamaammat suliffeqarfik namminersortunit pigineqartoq, Namminersorlutik Oqartussanit maanna misissueqqissaarfigineqarpoq, kiffartuussinissamik isumaqatigiissummi aningaasartaasut, 11 millionit koruunit, ilaat tunniutinngitsooneqassanersut ilanngullugit.
-Ukioq 2012-ip ingerlanerani pisimasut maannakkut misissoqqissaarneqarput aammalu tapiissutinut tunngasut pillugit qanoq kinguneqarsinnaanerannut tunngasut ilanngullugit, Aalisarnermut Piniarnermut Nunalerinermullu Naalakkersuisoq Ane Hansen oqarpoq.
Arctic Green Food-ip tunitsiviisa aqqaniliusut arfineq pingasut matoqqanerannut pissutaasut amerlapput, soorlu Ikamiuni aamma Aappilattumi Nanortallip eqqaaniittumi qerititsivii aamma qerinasuartitsivii innaallagissamik naammattumik pilersorneqarsinnaanngimmata pisortanit matuneqarput, Napasumi tunitsivik saarulliit tarajortikkat, imminut akilersinnaasumik tunineqarsinnaanngimmata Napasumi tunisassiorfik matuneqarpoq.
- Sooruna akuersaaruminaatsorujussuuvoq taamak annertutigisumik matoqqatitsinerit Ane Hansen oqarpoq, ilanngullugulu oqaatigaa kiffartuussinissamik isumaqatigiissuteqarnerit siusinnerusukkut isumaqatigiissutigineqarneranni tunitsivinni aserfallatsaalinerit eqqumaffigineqarpallaarsimanngitsut, Aalisarnermut Piniarnermut Nunalerinermullu Naalakkersuisoq oqarpoq.
Kiffartuussinissamut isumaqatigiissuteqarnermi aalisakkanik kalaaliminernillu tunisassiornissaq pingaarnertut siunertarineqarpoq, aammali suliffissaqarniarnerup suliassaqartitsiniarnerullu qulakkeerneqarnissaa pillugit. Kiffartuussinissamut isumaqatigiissutigineqartumi aningaasaliissutigineqartut 11 millioner koruunit ilai, Arctic Green Food-ip tunitsiiviisa matoqqasariaqarnerat pissutigalugu utertinneqassanersut Naalakkersuisut Arctic Green Food-ilu oktoberip naannerani ataatsimiinneranni oqaluuserisassaannut ilaavoq.
- Arctic Green Food-imik kiffartuussinissamik isumaqatigiissummi aningaasat atorneqartut mississorneqarneranni, aningaasat utertinneqarnissaannut Naalakkersuisut piumasaqarnissamut tunngavissaqarnersut takutikkumaaraat, Ane Hansen oqarpoq.
Tapiissutigineqartartut pillugit Naalakkersuisut ukiuni kingullerni sukaterisimapput, tapiiffigineqartullu malinnaavigeqqissaartarlugit Ane Hansen oqarpoq. Maannakkut misissueqqissaarnermi inernerit takutikkumaarpaat iliuusissat tullii suujumaarnersut, Aalisarnermut Piniarnermut Nunalerinermullu Naalakkersuisoq Ane Hansen oqarpoq.
Inatsisartuni ilaasortat Ruth Heilmann Siumut aamma Juliane Henningsen IA, Arctic Green Foodimi kiffartuussinissamik isumaqatigiissut naapertuuttumik atorneqarnersoq paragraf 37 naapertorlugu Naalakkersuisunut apeqquteqaateqarput.
