Tunissutisianik utertitsipput
Ullumi ulloq Danmarkimi immikkut taaguuteqarpoq, tassa Juullimi tunissutisianik utertitsiffissuartut taaneqartarluni.
Nuummi tunissutisianik aamma utertitsisoqarsimanersoq, pisiniarfiit ilaannut paasiniarparput; taamaapporlumi.
Pisiniarfiup Ole’s Varehus-ip atisaarniarfittaani sulisup Petrine Hansenip tamanna uppernarsarpaa:
- Utertitsisoqalaartukasiuvoq. Juulliaqqami ullaap tungaa ammagattali utertitsisoqallattaalereerpoq, Petrine Hansen oqarpoq, nangillunilu:
- Utertitsiniaraanni pisiassap maanngaanniit pisiarineqarsimanissaa siullertut qulakkeeqqaartarparput, aappassaattullu piumasaqaataavoq pisiassap byttemærkemilersorneqarsimanissaa.
Utertitsiniaraanni pisinermut uppernarsaateqarnissaq, tassa kvittering-eqarnissaq pingaaruteqartoq Petrine Hansenip erseqqissaatigaa.
Pisiniarfimmut isertut ilaat, Saattormiu Ane Løvstrøm, tujuuluaqqamik tattukkaminik utertitsivoq:
- Tunitikkaluarama tattorakku, taava aamma taarseraluarakku aamma angigalugu, aatsaat ullumikkut iluatsippara, torrattorujussuuvoq, Saattormiu Ane Løvstrøm oqarpoq.
Arnaq angutip tipigissaataanik tunisissimasoq, ullaap tungaani aamma utertitsiartorsimasoq, Matas-imi pisiniartitsisut ilaat Jens Pele Sakæussen oqaluttuarpoq.