Tunissut 80 millionit koruuninik akilik

Ilulissat kangerluata sulluanik ilisimasaqarfittut illorsuassap sananissaa 2002-mi oqallisaalerpoq. Maanna illussanik titartaasarsoq nunani tamalaani tusaamasaasoq Peter Zumthor Schweiz-imeersoq nalunaarpoq illorsuup ilusissaanut missingiutaagallartoq ukioq naatinnagu saqqummiunniarlugu.

Illorsualiorniarnermi siunertaavoq Ilulissat kangerluat pillugu ilisimasat siammarnissaat taannalu 2004-mi nunarsuarmi kingornussassanut ilanngunneqarpoq. Universitetit ilisimatusarfiillu qanimut suleqatigalugit saqqummersitassat suliarineqartassapput tutsuiginartuunissaat qulakkeerniarlugu.

Illorsuup imminut pigisussap malittarisassai kommunalbestyrelsep 2010-mi akuersissutigai illorsuarlu maanna Sermermiut aqqutaata naanerani katsorsaaviup Qaqiffiup ungasinngisaani sananeqartussanngorpoq.

Naatsorsuutigineqarpoq illorsuassaq 1.000 kvadratmeterinik angissuseqassasoq 80 millionit koruunillu missaannik akeqassasoq. Tassaniissapput saqqummersitsiviit, allaffiit, filmertarfik, videonut toqqorsivik, issittoq pillugu filmilianik katersat, atuakkanik atorniartarfik kiisalu atuarujoortarfik ilisimasartullu suliffissaat, Ilulissat kangerluata sulluanik ilisimasaqarfiup nutaarsiassanik allagaani allaqqavoq.

Peter Zumthor nunani allani illorsuarnik arlalinnik titartaasarsimavoq illussanillu titartaasartunut nersornaammik ataqqisaasumik Pritzker prize-mik tunineqarnikuulluni.

- Ilulissat kangerluata sulluanik ilisimasaqarfimmik Peter Zumthorip titartaaniarnera pingaaruteqarluinnartussaavoq aningaasaateqarfinniit aningaasaliissutissat qulakkeernissaannut, nutaarsiassatut allakkani allapput.

Innuttaasunik  ataasinngornermi oktobarip pingajuani ataatsimiisitsisoqalerpat iluliarmiut suliaq pillugu ilisimatinneqartussanngorput. Tassani innuttaasut suliassaq pillugu apeqquteqarsinnaatitaassapput.

Naatsorsuutigineqarpoq illorsualiaq 2012-mi sanallugu aallartinneqassasoq.