Assi: Inuit Ataqatigiit

URANI Tunisisarnissamut siunnersuut danskit amerlanerussuteqarfigaat

Uranimik avammut tunisisarnissamut inatsisissatut siunnersuut, Folketingimi aappassaaneerneqarmat siunnersuutip itigartitsissutigineqarnissaanik Inuit Ataqatigiit Enhedslistenilu kissaateqartutuaapput.

Uranimik avammut nioqquteqarneq naalagaaffiup isumannaatsuunissaanik politikkimut attuumassuteqarmat Danmarkip naggataagut akisussaaffigivaa.

Uranip avammut nioqqqutaasinnaanera Folketingimi aappassaanneerneqarmat ullumi taama inerniliisoqarpoq.

Inatsisissatut siunnersuut amerlanerussuteqarluartut taperserpaat,  tassa kikkut urani Kalaallit Nunaanneersoq assartussaneraat Erhvervsstyrelsen Danmark naggataagut kisimi aalajangiisussaasuutinneqarmat.

Aamma atuaruk URANI Uranimik avammut nioqquteqarnissaq akuersissutigineqartoq

Aamma atuaruk Innuttaasunik taasititsisoqassanngilaq

Inuit Ataqatigiit Enhedslistenilu kisimik siunnersuummut akerliupput tunngavilersuutigaallu aatsitassarsiornermut tunngasutigut akisussaaffik Danmarkip taamaalilluni utertikkaa, Kalaallit Nunaatami taanna tamaat 2010-mi tigugaluarmagu.

- Inatsisissatut siunnersuummut Inuit Ataqatigiit isumaqataanngillat. Aammalu Naalakkersuisut isumaqatiginagit aatsitassarsiornermi oqartussaaffinnik aalajangiisinnaassutsillu ilaannik Danmarkimut utertitsimmata, Aaja Chemnitz Larsen Inuit Ataqatigiinneersoq oqaluttarfimmit oqarpoq.

Konservatiivit Nunarput pillugu oqaaseqartartuata Rasmus Jarlowip IA'p isornartorsiuinera ajuusaarutigaa.

- Isumaqarpunga assut uggornartuusoq Kalaallit Nunaata tungaaniit misigigaanni Kalaallit Nunaata tigoreersimasaanik akornusersorneqartutut.

Kisianni aamma ilanngullugu ima oqarluni:

- Akunnattoornaannarami, inuussutissarsiornermut imalunniit isumannaallisaanermut politikkiunersoq. Uanga isumaqarpunga sakkussianut atomitortunut atorneqarsinnaasut isumannaallisaanermut tunnganerusut inuussutissarsiutinut tunnganerunatik, Rasmus Jarlow oqarpoq.

Urani Nunatsinneersoq pillugu inatsisissatut siunnersuut alla ullumi kingusinnerusukkut aamma Folketingimi aappassaanneerneqassaaq. Inatsisissatut siunnersuutit marluutillugit allannguuteqaratik sisamanngorpat tallimanngorpallu akuerineqarnissaat ilisimagineqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat