Tunisassiorfissaq nutaaq Aappilattumiittoq piariilersoq
Royal Greenlandip tunisassiorfigisimasaa Aappilattumiittoq 2017-imi junimi isaterneqareermat tunisassiorfik nutaaq sanaartorlugu aallartinneqarpoq. Mannalu tassa piariingajalerluni.
Nunaqarfimmi aalisartut siornatigut ullormut tonsit pingasut sisamallu akornanni tunisassiorfimmut tunisisinnaasarsimapput, maannali aalisartut nuannaarutigisinnaasaannik tunisassiorfimmi nutaami ullormut 15 tonsit angullugit tunisisinnaanissaminnut periarfissaqalissasut Royal Greenland nittartakkamini allaaserisaqarpoq.
Aappilattumi tunisassiorfiup nutaap quersuaa qerititsiviutigisup 300 tonsit sinnerlugit inissaqartippai, tassa siulianut sanilliullugu marloriaataa sinnerlugu inissaqarnerulluni.
Quersuup qerititsiviutigisup allineqarneratigut tunisineq tunisassiornerlu ukioq kaajallallugu pisinnaalisapput.
Sapaatilli akunnerata tulliani tunisassiorfik ammassaguni, atortussat kingulliit piffissaq eqqorlugu tikittariaqarput.
- Aappilattumi tunisassiorfimmik nutaajusumik sanaartornermi atortussanik tunniussinerit kingulliit sapaatip akunnerani uani pissappata Aappilattumi Royal Greenlandip tunisassiorfissaa nutaaq sapaatip akunnerata tulliani tunisassiorluni aallartissinnaassaaq, Royal Greenlandimi teknikkikkut suliani aqutsisoq, Niels Bak, Royal Greenlandip nittartagaanut oqarpoq.
AAMMA ATUARUK Royal Greenlandip ingerlatsinera RAL-ip ajornartorsiorneranit eqqugaasoq
Aappilattumi tunisassiorfissap nutaap novembarimi naammassereertussaagaluarpoq. Kinguaattoornerli sanaartornermi atortussat kingusinaarlutik tunniunneqarnerannik kiisalu assartuinermi ajornartorsiutinik pissuteqartoq suliffeqarfik allappoq.
- Naak aporfeqarsimagaluarluta aamma kinguaattooraluarluta maanna ukiup naannginnerani naammassisinnaalernerput nuannaarutigaarput. Ukiup naannginnerani naammassisinnaalernerput ilaatigut sanaartornermi suliaqartut aamma Upernavimmi Royal Greenlandimi sulisut sulilluarnerisigut pisinnaalerpoq.
Aappilattumi tunisassiorfiup nutaap sanaartorneqarnerani 2017-imi oktobarip naanera tikillugu aalisartut umiarsuarmut tunitsivimmut, Royal Greenlandip attartugaanut, tunisisarput. Umiarsuup tunitsiviusup atuutsinneqarnerani ukioq manna septembarip qulingat tikillugu nunaqarfimmi aalisartut aatsaat taama tunisaqartigalutik qaleralinnik siornarniit 450 tonsinik annertunerusunik tunisaqartut, Royal Greenland allaaserisaqarpoq.
