Tunisassiorfik ukiumi suliakillissaaq

Qasigiannguani tunisassiorfik ukioru tamakkiisumik ingerlassanngilaq, kisianni sulisut 60-70-it suliinnassapput.
Assi © : EMJ
Allattoq Jens Thorin
decembarip 07-at 2015 14:28

Royal Greenlandip Qasigiannguani tunisassiorfiani suleqatigiit ataatsit ukiuunerani sulisinnaapput. Tassa sulisut 60-it 70-it.
Tamanna Inatssiartunut ilaasortaq Jess Svane paragraf 37 atorlugu apeqquteqataanut akissummi atuarneqarsinavoq.

Royal Greenland Naalakkersuisunut ilisimatitsisimavoq, Qasigiannguani tunisassiorfimmi qaleralinnik qerisunik tunisassiornissaq pilersaarutaasoq.
Qasigiannguanut qaleralinnik avataaasiorluni pisanik ukiumut 650 tonsinik tulaassisoqartarpoq.

Allanut tunisisalertut

Taakkua qangamut naleqqiullugit affaannaapput, qanga tulaassisussaatitaaneq atuutilersinneqarmat akuersissutinut atatillugu aalajangerneqarmat, avataani aalisartut pisatik Qasigiannguanut tulaattasagaat.

- Tamanna sumiiffinnut aalajangersimasunut pinngitsaaliissutaajunnaarsillugu tulaas-sisussaatitaanermut kingusinnerusukkut allanngortinneqarpoq. Tamannalu Polar Seafoodip massakkut Aasiannut tulaassisalerneranik kinguneqarpoq, taamaalillutil-lu Qasigiannguanut tulaanneqartut annertussusiat affaannanngorsimallutik, aalisarnermut naalakkersuisoq Karl Kristian Kruse allappoq.  

Qasigiannguani tunisassiorfik qaleralinnik avataani aalisarneqartunik tulaanneqartussaatitaasunillu tunisassiornerup saniatigut qalerannik qanittumiit tulaasanik saarullinnillu sinerissap qanittuani pisanik tunisassiorpoq.

Qerititsiviit imaarneqartarput

Qeqertarsuup Tunuani tunisassiorfinnut ukiuunerani aalisakkanik tunisassiassaaleqiffiusarmat, taavalu avannaani tunisanut naleqqiullugit qerititsiviit mikimmata, tamanna eqqaarsaatigalugu qanoq pilersaaruteqartoqarnersoq, Jess Svanep aamma paaserusuppaa.

Tamatumunnga Karl Kristian Kruse akivoq, Uummannami Upernavimmilu qeritsitsiviit umiarsuaqarneri tamaasa imarneqartartut.

- Qerisunut toqqorsiviit ukiuunerani ulikkaarneqartarput, umiarsuarnik assartuisoqanngikkaa­ngat. Qerisunut toqqorsiviit Avannaaniittut Qeqertarsuullu Tunuaniittut umiarsuas­sa­qartinnagu imaarniartarnerat unammilligassaasarpoq, Karl Kristian Kruse allappoq.