Tunisassiorfik suli ammarneqanngilaq
Ittoqqortoormiini tunisassiorfeqaleqqinnissaq suli sulissutigineqartoq, Sermersooq Business Councilimeersoq Ulla Lynge KNR-imut paasissutissiivoq.
Tunisassiorfik, 2008-mili matuneqartoq, upernaarmanna martsimili ammaqqinneqarnissaa pilersaarutaagaluarpoq.
Namminersorlutik Oqartussat tunisassiorfiup ammarneqaqqinnissaanut aningaasanut inatsimmi 2012-imiit 2016 ilanngullugu 4 millionit koruuningajannik aningaasaliissuteqaraluarput. Tamanna Ulla Lyngep uppernarsarpaa, oqaatigalugulu aningaasat taakku ataatsimeersuarnermut, aqqusinniornermut tunisassiorfiullu aaqqissuunneqarneranut atorneqareersut.
Aamma atuaruk Illoqqortoormiuni tunisassiorfiup ammaqqinneqarnissaanut piareersartoqarpoq
Tunisassiorfik ammarpat umimmaat, puisit qilalukkallu neqaat Nunatta sinneranut tunineqartalissasut pilersaarutigineqarpoq. Tunisassiorfiulli iluarsartuunneqarnera ajornartorsiutitaqarsimammat ammaqqinneqarnissaa kinguartinneqartoq, Ulla Lynge oqarpoq nangillunilu:
Ittoqqortoormiini tunisassiorfimmut ingerlatserusussinnaasunik isumaqatiginninniartoqaleruttorpoq.
Sermersooq Business Councilip, pilersaarut malillugu, ingerlatsisussaq Ittoqqortoormiini qaammatip tulliani ataatsimeeqatigiartussavaa, tunisassiorfimmillu pilersaarutit pillugit innuttaasunut tassani paasititsiniaasoqassalluni.
Tunisassiorfiup ingerlanneqarnera Arctic Green Foodimit tiguneqarmat tamanna isornartorsiorneqangaatsiarneqarpoq, suliffeqarfiummi kiffartuussinissamik isumaqatigiissuteqarfigineqaraluarluni tunisassiorfik ammatissinnaasimanngimmagu
