Tunisassiorfiit ittui:-Keld Askær uggoraarput!

Sinerissami Royal Greenlandip tunisassiorfiini aqutsisut Keld Askær maqaasissaqqooqaat, taakku ilaat ugguaqaat, ilaalli aamma oqaaseqarumanngillat.

Paamiuni Sisimiuni Narsami Ilulissani Aasiannilu tunisassiorfiit ittui oqaaseqarumanngillat. Tamannalu eqqumiiginarsinnaavoq.

Paamiuni tunisassiorfiup pisortaata Kunuk Albrechsenip tunngavilersuutigaa ukiup affaannaa taamaallaat atorfeqarsimagami taamatut oqaaseqarusunnani. Narsami tunisassiorfiup pisortaa Elias Didriksen ukiuni 20-ni pisortaasimavoq taannattaaq aamma tamanna pillugu oqaaseqarumanngilaq.

Tunisassiorfiilli pisortaat avannaaniittut oqaaseqarusupput, Qeqertarsuup tunisassiorfiani pisortaq Knud Mølgaard ima oqarpoq:

- Keldip soraalernera tusarlugu tupannarpoq, taama piginnaaneqartigalunilu iluaqutaatigisoq uggornaqaaq.

Sulisuminut ammasuuvoq, eqqissisimasumillu pissuseqarnera toqqissisimanartuulluni, Knud Mølgaard oqarpoq.

Aammaattaaq Qasigiannguani tunisassiorfiup aqutsisuisa uggorisimaqaat, Tiu Didriksen ima oqarpoq.

- Uggornaqaaq, inummik pikkorissumik annaasaqarpugut.

Uummannap tunisassiorfiani pisortaasup, Niels Ole Møllerip, oqaatigaa, pisortaasartut allat ajornartorsiortoqalersorlu qimaguttartut, taanna allaanerusumik iliortoq.

- Pissutsit ilorraap tungaanut aallarteqqaarlugit soraartussanngorpoq tamannalu uggornartuuvoq, Niels Ole Møller oqarpoq. Taannattaaq sulisut sinnerlugit Royal Greenlandip siulersuisuini ilaasortaavoq.

Taassuma pingaarnerpaatut isiginngilaa.

- Royal Greenland nunanut tamalaanut siammasissorujussuuvoq, pisortarlu nunarsuarmut sumulluunniit angalasinnaasariaqarpoq, Niels Ole Møller oqarpoq.

Taannattaaq oqarpoq, sinerissami tunisassiorfiit ilaasa matuneqarnerat paasisinnaagini.

- Ammatinniarneqaannarsimagaluarpatami nunatsinni tunisassiorfiit tamarmik matusussanngorsimassagaluarput, oqarpoq.

Sulisut qinigaattut siulersuisuni ilaasortaq alla, Sisimiuneersoq, Lars Berthelsen, aammattaaq ugguarpoq.

- Siornatigut tunisassiorfiit matugaangata kinguneri kommuninut isumagisassanngortinneqartaraluarput, Keld Askærilli tamanna allaanerusumik iliuuseqarfigaa, tassa Royal Greenland Academy-mik taasamik sulisut inuttut ineriartortinneqarnissaat sulissutigaa, Lars Berthelsen oqarpoq.

Naalakkersuisut siulittaasuat Hans Enoksen Keld Askærip soraarnissaa pillugu itinerusumik oqaaseqarusunngilaq.

- Tamanna tusaatissatut tiguara, Hans Enoksen, maanna Nuummut utereersimalersoq, taamatuinnaq oqarpoq.