Tunisassiassaraluit suli annissorsinnaassavaat
Qalerallit suliareqqinneqanngitsut 15.000 tons 2009 nunatsinniit anninneqarput. Naalakkersuisulli pisinnaatitaaffeqanngillat piumasarissallugu tulaassat tamarmik nunatsinni suliarineqassasut.
Siumut sinnerlugu Inatsisartuni ilaasortaq Kristian Jeremiassen paragraf 37 atorlugu apeqquteqarpoq taamatut annissuisarneq Naalakkersuisut qanoq iliuuseqarfigilersaarneraat. Naalakkersuisulli neriuutigiinnarsinnanerarpaat tunisassiorfiutillit aalisakkat nunatsinni suliarerusussagaat.
- Tunitsiviit ingerlatseqatigiiffittut ingerlanneqartut piginnittuisa aalajangigassaraat aalisakkat tulaassorneqartut qanoq tunisassiarineqartassanersut. Naalakkersuisut isumaqarput ingerlatseqatigiiffiit aalisakkanik naammassillugit tunisassiortarnissaminnut tunngavissaqarluarlutillu kajumissuseqartariaqartut, taamaasiornikkummi aalisakkat nalituninngortinneqarsinnaammata, aalisarnermut Naalakkersuisoq Ane Hansen taama akissuteqarpoq.
Umiarsuarnillu tunitsiviliinissamut soqutiginninneq 2011-mi aamma malunnarsereerpoq. Ingerlatseqatigiiffiit assigiinngitsut tallimat qinnuteqarsimapput Uummannap Upernaviullu eqqaanni tunitsiviliinissamut qinnuteqartut ilaat umiarsuarni tunisassiornissamik pilersaaruteqaratik. Taamaattorli qularnarpoq akuersissummik tunineqarnissaat.
- Qalerallit eqqarsaatigalugit Naalakkersuisut aalajangernikuupput sinerissap qanittuani qaleralinniarnermi sippulimmik tunisassiorfeqartoqannginnissaa pinaveersaartikkumallugu 2011-mi umiarsuarnik assartuutiliinissat tunitsiviliinissallu aallaviatigut mattusimaneqassasut. Ilaatigooriarlunili unammilleqatigiinnermut tunngasut salliutinneqarsinnaasarsinnaasapput. Qinnuteqaatilli ingerlaavartumik isummerfigineqartarput piumasaqaatillu siuliani saqqummiunneqartut tunngavilugit nalilersorneqartarlutik, Ane Hansen taama oqarpoq.
