Tuniniaqqitassaminnik tillinniat tigusaapput
Nuummi angutit inuusuttut tillinniarneri Pisiffimmi Videobutikkimilu Nuukullammiittumi pisimapput.
Pisiffimmi tillinniarneq marlunngornermi marsip aallaqqaataani pisimavoq, nioqqutissat assigiinngitsut, soorlu kavaajat, katillugit 18.000 koruuninik nalillit tillinniarneqarsimallutik.
Angutit tillinniarnerat tulleq Videobutikken-imi Nuukullammiittumi tallimanngornerup arfininngornerullu unnuaani pisimavoq, tassani nioqqutissat Playstationit spillerpassuillu katillugit 70.000 koruunit tungaannut nalillit tillinneqarsimallutik.
Angutit tillinniarsimanissaat pasitsaanneqarpoq angut inuusuttoq tillitaassagunavissunik sapaammi ualikkut aqqusinermi tuniniaasoq, innuttaasut ilaata pasitsaammagu, politiinullu oqaatigalugu. Angut politiinit tigusarineqarami nassuerpoq tillinniaqarnernut peqataasimalluni. Angerlarsimaffinni kingorna misissuinerni angutit allat marluk tigusarineqarput. Angutit 20-t 25-llu akornanni ukioqartut ullumi kingusinnerusukkut tigummigallarneqarnissaat pillugu Nuup Eqqartuussiviani sassartinneqassapput.
Tillitanik pisisut aamma akiliisinneqassapput
Tigusaasut pingasut saniatigut inuit allat tallimat, tillitanik pisiaqarsimasutut akiligassinneqassapput, suliami ataatsimi 5.000 kooruninik akiligassiisoqareerpoq.