Nuummi misissuivimmi siuleriiaattut. Toqqorsivimmit assiAssi: Malik Brøns / KNR

Tunillatsissimasut nutaat arfineq-pingasut: Tuniluuttoqarnissaanut aarlerinartoqartoq

Nunatsinni coronamik tunillatsissimasut ikiliartunngillat.

Tunillatsissimasut nutaat arfineq-pingasut ippassaq paasineqarput.

Naalakkersuisut tusagassiuutinut taama nalunaaruteqarput.

Aasianni arfinillit, Qasigiannguani ataaseq Nuummilu ataaseq tunillatsissimasut ataasinngornermi misissuinerit takutippaat.

Taamaalilluni nunatsinni tunillatsissimasut katillugit 46-nngorput: Upernavimmi nunaqarfinnilu Upernaviup pigisaani tunillatsissimasut 19-iupput, Nuummi arfineq-marluk, Kommune Qeqertalimmi tassa Aasianni Qasigiannguanilu 29-t tunillatsissimallutik.

Kommune Kujallermi tunillatsissimasut tamarmik peqqisseqqipput.

Tunillatsissimasut kommunikkaarlugit agguataarnerat

Avannaata Kommunia: 19

Kommune Qeqertalik: 20

Qeqqata Kommunia: 0

Kommuneqarfik Sermersooq: 7

Kommune Kujalleq: 0

Tuniluunneq tuniluuffiusuni ilisimaneqareertunit Upernavimmit Aasianniillu tuniluuppoq, taamaammallu tuniluutianerujussuarmik Deltamik tunillatsittoqarnera ilimanarluinnarluni, Naalakkersuisut paasissutissiipput.

Tunillatsissimasut nutaat tamarmik tunillatsereernerminni kingorna angalasimapput. Taamaammat tuniluuttoqaqqissimanissaa ilimanaateqartorujussuuvoq.

  • Upernavimmiit Ilulissanut juulip ulluisa 27-anni timmisartumut (GL 205-imut) ilaasimaguit erngertumik misissortissaatit.
  • Ilulissanit Aasiannut juulip ulluisa 28-anni timmisartumut (GL533-mut) ilaasimaguit aamma erngertumik misissortissaatit.

Ilaasimasut tamarmik "misissortinnerisa inernerata paasineqarnissaata tungaanut mianersorluinnaqqissaassasut" Naalakkersuisut paasissutissiipput.

Qasigiannguani Uilu-baarimi juulip ulluisa 28-anni unnukkut kingusissukkut tuniluuttoqarsimanissaa aamma aarlerinaateqarpoq.

Inuit piffissami pineqartumi imerniartarfimmiissimasut erngertumik misissortinnissaannik misissortinnermilu inernerisa paasinissaannut mianersorluarnissaat aamma kaammattuutigineqarpoq.

Upernavimmi sumiiffimmilu allani misissuinissamut atortoqanngitsuni killilimmilluunniit atortorissaaruteqarfiusumi misissuisoqarpoq. Sumiiffinnit taakkunannga misissugassat Ilulissani marlunngornermi misissorneqarnissaat naatsorsuutigineqarpoq.

Tunillatsissimasut mattusimasut

Tunillatsissimasut angerlarsimallutik maanna mattusimapput, tunillatsissimasinnaasunillu ujaasineq ingerlaqqippoq. Tunillatsissimasumut qanillisimasut Corona pillugu Allattoqarfimmit attavigineqassapput.

Tunillatsissimasumut qanillisimasut qanillinerminninnit ulluni arfineq-marlunni angerlarsimaannassapput.

Taakkulu ullut arfineq-marluk qaangiuppata PCR-imik misissorneqassapput, misissortinnerisalu inernerata tunillatsissimanngitsoq takutippagu angerlarsimaannaqqusaanerat atorunnaassalluni.

PCR-imik misissuineq tassaavoq vatpindi atorlugu toqqusaakkut tigusiffigitinneq.

AAMMA ATUARUK Tamaat isigalugu: Coronavirus pillugu killiffik

Angerlarsimaannartussaatitaanerup uninnginnerani misissuinermi tunillatsissimannginneq paasineqaraluarpalluunniit, tunillatsissimasimasumut qanillisimasut ullut arfineq aappassaanni misissuinermi tunillatsissimannginnerup paasineqarnissaata tungaanut angerlarsimaannassapput.

Tunillatsissimasumullu qanillisimasut Covid-19-imut ersiutaasinnaasut tunillatsissimasumut qanillinermiit ullut 14-it ingerlanerinni annertunerusumik eqqumaffigissavaat.

Tunillatsissimasut aatsaat taama amerlatigisut

Nunatsinni siorna marsimi tunillatsissimasoqaqqaarneraniilli aatsaat taama amerlatigisut tunillatsissimapput.

Tunillatsissimasunik nalunaarsuinerit arlaleriarluni 0-imiissimavoq - kisitsit taanna juulip aallaqqaataani aamma 0-imiippoq - tunillatsissimasulli tamatuma kingorna amerliartuinnalerput. Tuniluunneq Ilulissani, Nuummi Qaqortumilu aallartippoq - tunillatsissimasullu taakku tamarmik nunatsinnut Københavnimiit timmisartorsuarmut juulip ulluisa arfernanni marlunngornermi ilaaqatigiissimallutik.

Tamatuma kingunerisaanik killilersuinerit sukannersut tassa inuit amerlanerpaamik 20-oqqusaanerat kikkullu tamarmik tamanit ornigarneqartuni qanermut assiaquteqaqqusaanerat atuutilersinneqarput.

AAMMA ATUARUK Nu laver politiet stikprøver af dig og din vaccine

Malittarisassat taakku nunatsinni sumiiffinni amerlanerpaani arfininngornermat atorunnaarsinneqassapput. Taakkununngalu taarsiullugu tamakkiisumik akiuussuserneqarsimanermut uppernarsaat imaluunniit coronamik tunillatsissimannginnermut uppernarsaat sivisunerpaamik akunnernik 48-nik pisoqaassuseqartoq atorlugit neriniartarfimmut, timersortunut, imerniartarfinnut, atuakkanik atorniartarfimmut, filmertarfimmut allanullu aatsaat isertoqarsinnaalerpoq.

Pisiniarfimmut atuarfimmulluunniit iserniaraanni tunillatsissimannginnermut uppernarsaateqarnissaq tamakkiisumilluunniit kapitissimanissaq piumasaqaataanngilaq.

Aasianni, Upernavimmi Upernaviullu nunaqarfiini piffissami matumani aqunneqarsinnaanngitsumik tuniluuttoqarnera pissutigalugu malittarisassat atuutiinnarput.

Nunatta avannaani pisortat assartuissutaannut ilaanissamut malittarisassat aamma sukannerneqarput: Upernavimmit, Aasiannit Upernaviullu nunaqarfiinit aallarniartut timmisartumut allanulluunniit bussinut ilaanissamut tamakkiisumik akiuussuserneqarsimanissaat imaluunniit tunillatsissimannginnermut uppernarsaammik sivisunerpaamik akunnernik 48-nik pisoqaassusilimmik takutitsinissaat piumasaqaataavoq.

Isummersuutit

Nunatsinni coronavirusi pillugu
killiffik

Tunillatseqqasut 126  
Ullumi tunillatsittut 35  
Siullermik kapitissimasut 40.955  
Aappassaa kapitissimasut 35.924  
Tunillanneqarsimasut 504  
Uninngasut 1  
Anersaartuuteqartitaasut 0  
Toqquteqartut 0  
corona.nun.gl-imi kisitsit takukkit  
   Nutarterneqarpoq: 
Septembarip 21-iat 12:00
 

Coronavirusimik tunillatsinissaq pinaveersaaruk