Tunesiami naalakkersuisunngortut ajoraat
DR-ip ilanngutassiortua Steen Nørskov illoqarfiit pingaarnersaanni Tunisimiippoq, tassanngaanniillu naalakkersuisunngortut qanoq isumaqarfigineqassanersut naliliiffigai.
Assigiinngitsunik isumaqarfigineqassagunarput. Ilaasa oqaatigissavaat piumasaqaatitik naapertorlugit naalakkersuisuutitaqarsimasut illuatungiliuttullu pissaaneqarnermik avitseqatigiikkallartut, tassa ullut 60-it qaangiutsinnagit qinersisoqarnissaata tungaanut. Naak illuatungiliuttuusimasut ilaat ukiorpassuarni paarnaarusimaneqarlutik naalliutsitaasarsimagaluartut. Inuusuttulli Ben Alip uppititaanissaa piumasaralugu akerliussutsimik takutitseqattaarsimasut, naalakkersuisunngortunik iluarinninnavianngillat.
Innuttaasut akerliussutsimik takutitseqattaarnerat præsidentillu qimaanera demokratii naapertorlugu ingerlatsisoqalernissaanut qanillatuinertut isiginiarneqarpoq. Tamannali ilumoornerpoq?
Ilaatigut pissutsit nutaanngornerarneqarsinnaapput - soorlu præsidentip tallimanngormat qimaanerata kingorna radiomik tusarnaartut tusaasatik upperisinnaalerpaat - siornatigut tusakkatik upperisinnaaneq ajoraluaramikkit. Allatigulli pissutsit taamaaginnarsorineqarsinnaapput, soorlumi unnuleraa inuit angerlarsimaffimminniit aneqqusaajunnaarmata sakkutuut sumi tamaaniittut eqqaassanngikkaanni aqquserngit inoqanngillat.
