Tunesiami aarlerisoqalerpoq

Tunesiami inuusuttut qaammatit marlussuit matuma siornatigut pikitsitseriarlutik ukiuni 23-ni præsidentiusimasumi Ben Alimik uppititsisut pakatsipput. Tamatumami kingorna 78-nik ukiulik præsidentiugallartussanngortinneqarpoq 84-nillu ukiulik ministeriunerugallartussanngotitaalluni. Tassa inuusuttut mumisitsinerisa kingorna utoqqaat naalakkersuisunngorput - imaluunniit gerontokratiimik taaneqartartoq naapertorlugu ingerlatsisoqalerluni - tamannalu siunertarineqanngilluinnaraluarpoq. Taassumalu saniatigut qinersititsinissaq demokratiilu naapertorlugu naalakkersuinikkut najoqqutassiornissaq utaqqikatanneqarluni. Suliluunniimmi suliarisassat piffissalersorneqanngillat. Nunani assigiinngitsuni mumisitsinialernerit Tunesiami aallartinneqarnerat eqqarsaatigalugu tamanna eqqumiiginarpoq. Taamaammat Tunesiami ilinniagaqartut nunaminni pisut Egyptenimi tuaviuussilluni demokratiimik eqqussiniarnermut assersuuttalerpaat oqarlutik; allannguisoqarsimanngilaq naalakkersuisunngortut tatiginngilagut. Tunesiallu aningaasaqarniarnera iluarsiartunngimmat inuit kingumut naammaginnikkunnaariartuinnarlutik sapaatip akunnerata naanerani akerliussutsimik takutitsisut politiillu aattaqaqisumik aporaapput. Taamaammat tassa sakkutuut naalakkersuinialernissaat aarleqqutigineqarpoq.