Tungujuaartorsuaq Japanimi 12 millionit koruunilerlugu tunineqartoq

Tungujuaartorsuaq 193,2 millionit yenilerlugu – tassa 12 millionit koruunilerlugu Japanimi Tokyomi akitsorterussinermi tunineqarpoq.

Japanimi tunit akitsorterunneqartarnerannik, 1999-imi nalunaarsuisoqartalerneranit taanna akisunerpaap tullerileraa, nutaarsiassaqartitsivik dpa allaaseraa.

Tuni 276 kiilumik oqimaassuseqarpoq, taannalu suliffeqarfimmit susheerniarfinnik Sushi Zanmai-imik ateqartunik ingerlatsisumit, Kiyomuramit pisiarineqarluni.

Tuni kiilumut 700.000 yeneqarpoq – tassa 43.500 koruunit.

AAMMA ATUARUK Tun-imik aatsaat taama akisutigisumik tunisisoqartoq

- Akisuvoq. Kisianni pisisartutta pitsaanerpaamik tunimik misiliinissaat kissaatigaara, Kiyomurami pisortaq, Kiyoshi Kimura tusagassiortunut oqarpoq.

Tuni Japanimi qeqertap Honshup avannarpasissuata isuani Omami aalisarfiit pitsaanerpaat ilaanni pisarineqarpoq.

Tuni Japanimi tunineqarsimasut akisunerpaap tassa tunip 278 kiilumik oqimaatsigisup 333,6 millionit yenilerlugu tassalu 20,8 millionit koruunit missaannik akilerlugu Kimurap siorna pisiarisaata tullererilerpaa.

Japanimiut tungujuaartorsuarnik nerisaqarnerpaat ilagaat, Japanimilu tuninik aalisapiluttoqartarnera nunat tamalaat akornanni piffissami sivisuumi isornartorsiorneqarsimavoq.