Tuluttut ilinniaqqinnissaq periarfissaaleqqippoq
Kalaallit tuluttut akeqanngitsumik ilinniartinneqartarneri Københavnim Amerikamiut aallartitaqarfia suleqatigalugu Nuummi Niuernermik Ilinniarfimmi ingerlanneqartartoq periarfissaaleqqissaaq. Siornami taamatut aaqqissuussisoqaqqaarmat ilinniarumasut imaaginnavissimammata ukioq manna aamma taamaattoqaqqinnissaa ilimanaateqarluarluni.
Allattoq Peter Troelsen, Knud Reimer
septembarip 10-at 2013 11:00
Tuluttut pikkorissarneri tallimat oktobarip qaammataani periafissaassapput. Tassa ulluinnarni tuluttooriaatsit, qarasaasiakkut tuluttooriaatsit, Sullissinermi tuluttooriaaseq, Tuluttut isumaqatigiinniariaatsit, kiisalu tuluttut oqalliseriaatsit nassuiaariaatsillu pikkorissaassutigineqassalutik.
Pikkorissarnissat arlaat peqataaffiginaraanni tamavimmik akeqassanngillat. Amerikamiummi aallartitaqarfiata kiisalu Joint Committee aningaasaliissussaapput pikkorissarnissallu tamarmik Nuummi niuernermik ilinniarfimmi ingerlanneqassallutik.
Pikkorissarnissat akeqanngitsut paasisaqarfiginerorusukkukkit: http://ninuuk.gl/internationalisering/us-embassy-english/ iserfigalugu atuarsinnaavatit.
