Meeqqat atuarfiini tuluttut qallunaatullu tiimit amerlineqarnissaanik Sisimiuni HTX-ertunit Inuusuttut Inatsisartuini siunnersuutigineqarpoq. Siunnersuutip ullumi aappassaaneerneqarnerani Ilinniartitaanermi ataatsimiititaliami aqutsisunillu, taperserneqarani itigartitsissutigineqarpoq.
Nielsigne Lennert-ip siunnersuummik saqqummiussisup siunnersuuteqarsimanerminnik nassuiaavoq, meeqqat atuarfianit ilinniarfinnut qaffasinnerusunut ingerlaqqinnermi ilinniarlertut tuluttut qallunaatullu ajornartorsiuteqartarnerat.
- Atuartitsissutigineqartut tamavimmik qallunaatut ingerlanneqartarput, Nielsine Lennert oqarpoq.
Ilinniartitaanermi ataatsimiititaliami siulittaasoq Abuluunnguaq Broberg itigartitsinerminnut nassuiaavoq, Atuarfitsialaap atuutilerneqarnerata kingorna meeqqat siusinnerusumik qallunaatut tuluttullu atuartinneqartalernikuummata.
Nielsine Lennert-ip aalajangiineq akuerivaa paasisinnaallugulu.
Atuarfitsialak aallartimmat atuartut 1. klassimi qallunaatortalerput, 4. klassimilu tuluttoortalerlutik. Siornatigut qallunaatoorneq 4. klassimi aallartittaraluarpoq, tuluttoornerlu 7. klassimi aatsaat aallartittaraluarluni.