Tuluppassuit Kangaamiuni sungiusarput

Tuluit politeerpassui sakkutuui taakkulu nakorsaat maannakkorpiaq Maniitsup Kangaamiullu eqqaanni upalungaarsimanissamut sungiusaleruttorput.
aggustip 05-at 2008 10:08

Avataaniit tikeraat pillugit Kangaamiuni takornarialerinermik sullissisartoq Regine Filemonsen ima oqaluttuarpoq.

- Inuit tikittussat katillugit 120-t missaanni tikissapput, ilaat 40-t tikereerput tallimanngorpallu 44-t tikissapput, arfininngorpallu aamma 44-t tikissallutik, Regine Filemonsen oqarpoq.

Tikeraat taakku tamarmik Tuluit Nunaanneersuupput, sakkutuujupput, politiiullutik aammalu taakku nakorsaat peqataapput.

Regine Filemonsen aperaarput sooq Maniitsup Kangaamiullu eqqaa toqqarneqarsimanersoq.

- Kangaamiut eqqaa periarfissanik ulikkaarpoq Kangerlussuatsiaat toqqarsimavaat qaqqai portullutillu sermeqarlunilu pisuffissartakkaammat, aammalu imartaani qajarissanik qajartorfissagimmat, oqarpoq.

- Massakkorpiaq Tasiusamiipput, sumiiffiit pingasut taqqavani atussavaat, Taateraat sermiannilu Kangiusamilu, taakungalu tungaanut ingerlaniaraanni akunnerup ataatsip missaani taavunngartoqarsinnaavoq, Regine Filemonsen oqarpoq.

Taanna oqaluttuarpoq siulliit tikittut juulip 21-iani tikissimasut aatsaallu septembarip 20-iani naammassissasut.

Taamatuttaaq tuluit tusagassiortui tallimat peqataammata ilimagineqarpoq ukiup tulliani Maniitsumut Kangaamiunullu takornarianik ussagartoqarnissaa.

Taama oqarpoq Kangaamiuni namminersortutut takornariartitsisartoq Regine Filemonsen.

Aaqqissuussaq tamanna Tuluit Nunaanni British Telecom Emergency Responce-team-imit aaqqissorneqarpoq.