Tulukkap naggueqatigiit ataatsimoortilerpai
- Nuanneqaaq taama Inuit suleqatigalugit. Isiginnaartitsisartutut sulininni aatsaat taama anersaaginnartigisumik suliaqarpunga, Vivi Sørensen oqaluttuarpoq.
Inuit oqaluttuarisaaneranni siullerpaamik, Inuit Nunavimmeersut, Nunavummeersut nunatsinneersuullu suleqatigiillutik isiginnaagassiamik pilersitsipput. Isiginnaagassiaq Tulugak Performancemik ateqarpoq - tulugaq pillugu oqaluttuarpassuit oqaritariaatsillu isiginnaartitsinerup imarivai - assersuutigalugu oqaluttuaq tulukkap arferup iluanut pisoq, tulukkap qernertinnera assigisaallu oqaluttuarnermik, isiginnaartitsinermik nipilersornermillu oqaluttuarineqarpoq.
- Inoqatigut suleqatigalugit pissarsinaqaaq uummatiginnaqaaq, nerioqaagullu tamatta nunatsinnut angalasinnaajumaarluta oqaluttuannguit takutissorlugit, Vivi Sørensen oqarpoq.
Akilinermi erinarsortartut, torlorsortartut, cirkusimik suliaqartartut, qilaatersortartut kalaallit suleqatigaat isiginnaagassiarlu Iqalunni juulip aappaani marloriarluni isiginnaartitsissutigalugu.
Iqalunni Alianait Arts Festivalertoqarnerani nunarsuarmi nipilersortartut assigiinngitsut aamma naapipput, nipilersortartut Inuit sumiiffinnit assigiinngitsuneersut naapillutik. Nunatsinnit nipilersoqataapput Angu Motzfeldt Nive Nielsenilu.
